هەماهەنگی لەنێوان گروپە ئێتنییەکانی باکوری سوریا کاریگەریی راستەوخۆی هەبووە بۆسەر پێشڕەوییکردن لە ئۆپەراسیۆنە بەردەوامەکانی دژی "دەوڵەتی ئیسلامیی لە عێراق و شام" (داعش) و دەنگۆی ناکۆکی لەناو هاوپەیمانێتییەکەدا هیچ نیە جگە لە هەوڵێکی قێزەونی دروستکردنی ناکۆکیی، وەك سورییەکانی باکور بە دیارونایان وت.

شەڕڤان دەروێش، وتەبێژی ئەنجومەنی سەربازیی مەنبیج کە بەشێکە لە هێزەکانی سوریای دیموکرات وتی درۆکانی داعش هەوڵێکە "بۆ دروستکردنی وێنای ناکۆکی لەنێوان کورد و عەرەبدا لە ناوچەکانی باکوری سوریا، بە مەبەستی بڵاوکردنەوەی کلتوری خوێن و ئاژاوە کە شێوازێکە لە خودی داعشەوە دوورنیە".

وتی هەر کە مەنبیج رزگارکرا، پێشەنگی دەدرێت بە دروستکردنی پرد و گەڕاندنەوەی پەیوەندیی نێوان ئەندامانی کۆمەڵگە بە بەشدارییپێکردنی هەموو گروپەکان لە بڕیاری دروستکردنی دەزگاکانی دادوەری، کارگێڕی، یاسادانان و جێبەجێکردندا.

وتی گروپە ئێتنییەکانی سوریا ناکرێت لێکجیاببنەوە چونکە "ئەو قۆناغە بە خوێنی کورد، عەرەب، سریانی، کلدانی و تورکمانەکان تێپەڕێندراوە، کە بۆ رزگارکردنی مەنبیج لە تیرۆرستان رژێنرا".

دەروێش وتی وەڵامدانەوەی درۆکانی داعش بە کرداری بەرپرس و خەڵکی مەنبیج دەبێت کە تەواو هۆشیارن بەو بەرپرسیارێتییەی لەسەر شانیانە بۆ دامەزراندنی کۆمەڵگەیەك "لەسەر بنەمای باوەڕبوون بە واقعی فرەیی و رێگەدان بە پێکهاتە مێژووییەکان گوزارشت لەخۆیان بکەن".

یەکگرتن دژی داعش

ئەفسەرێکی کورد لە یەکینەکانی پاراستنی گەل (YPG)، ئالان موراد، وتی: "پەیوەندیی نێوان پێکهاتە ئێتنییە جۆراوجۆرەکان کە دانیشتوانی باکوری سوریا پێکدەهێنن مێژویی و نایابە، ئەم پەیوەندییە ناوازەیەش بەتایبەت لەنێوان پێکهاتەی کورد و عەرەبدا بەئاشکرا دیارە."

موراد بە دیارونای وت: "سەرەڕای هەموو ئەو کەمپینە دژە-میدیاییەی هەوڵی دروستکردنی ئەو وێنایە دەدات کە کێشە بوونی هەیە لەنێوان ئەو دوو لایەنەدا، واقعەکە قوڵیی ئەو پەیوەندیە پشتڕاستدەکاتەوە، بەتایبەتی لە شەڕکردندا دژی داعش."

ناوبراو رونیکردەوە کە هاوپەیمانێتیی عەرەب و کورد رۆڵێکی گرنگی هەبووە لە پێکهێنانی هێزەکانی سوریای دیموکرات و ئەنجومەنی سەربازیی مەنبیج، کە سەرکەوتوبوون لە بەدەستهێنانەوەی ناوچەیەکی فراوان کە پێشتر لەژێردەستی ئەو گروپەدا [داعش] بوون.

موراد وتی: "رووداوەکانی ئێستای ناوچەکە رونترین و بەهێزترین وەڵامن بدژ بەو کەمپینە میدیاییانەی ئاماژە بەوە دەکەن کە کوردەکان هەوڵدەدەن عەرەبەکان لە باکوری سوریا دەربکەن." هەروەها ئاماژەشی کرد بەوەی خێڵە عەرەبەکان کە لە داعش هەڵدێن لە ناوچە کوردیەکاندا پێشوازییان لێدەکرێت و گرنگییان پێدەدرێت.

وتی جیا لەوەش، هێزەکانی کورد و عەرەب پێکەوە کاردەکەن بۆ پاککردنەوەی ناوچەکە لەو تەقەمەنی و مینانەی لەلایەن داعشەوە بەجێهێڵراون، بۆئەوەی دانیشتوانی ناوچەکە بە سەلامەتی بۆ ماڵەکانیان بگەڕێنەوە.

خێڵەکان بەشداریدەکەن لە شەڕدا

ئەندامی هۆزێکی مەنبیج، محەمەد حمەییش، وتی بڕیاری خێڵەکانی مەنبیج و ناوچەکانی دەوروبەری بۆ پشتگیریکردنی ئەنجومەنی سەربازیی مەنبیج قوڵیی پەیوەندییان بە کوردەوە پشتڕاستدەکاتەوە.

حمەییش رونیکردەوە کە "چەمکی لایەنگریی خێڵ و هۆز نەریتێکی بەربڵاوی ناو عەرەبەکانی باکوری سوریایە کە یاسای خۆیان هەیە و هەمووان ناچاردەکات یەك پێگە و یەك بڕیاریان هەبێت".

وتی هەربۆیە هاوپەیمانێتیی سەربازی لە ناوچەکانی مەنبیج و باب و جەزیرە "بەهێزترین بەڵگەی رێککەوتنێکی نەنوسراوەیە لەنێوان خێڵەکانی ناوچەکەدا کە بە یەکگرتوویی شەڕبکەن هاوشان بە هێزەکانی کورد بە نوێنەرایەتیی یەپەگە و هێزەکانی پاراستنی ژنان (YPJ)".

وتی خێڵی حەرب، کە یەکێك لە گەورەترین خێڵەکانی ناوچەکەیە، " لە مانگی حوزەیراندا راگەیەندراوێکی روونی بڵاوکردەوە کە هاوشانی هێزە کوردیەکان دەوەستێت لە شەڕدا دژی داعش و داوای لە هەموو خێڵەکانی دیکەش کرد هەمان کار بکەن".

حمەییش کە ئێستا لە دەوروبەری کۆبانییە و بەمدواییانە لەگەڵ خێزانەکەی ئاوارەی ئەوێ بوون، بە دیارونای وت ئەم هاوکارییەی نێوان عەرەب و کورد درێژدەبێتەوە تا دەگاتە ناوچەی رەققە کە چەندان گروپی سەربازیی هاوپەیمانی لێیە.

وتیشی: "شەڕکردن و لەناوبردنی تیرۆریزم تەنیا بە دروستکردنی پەیوەندیی بەهێز [بەدەستدێت] ."