Hikûmeta Swîsrî roja Pêncşemê (21ê Kanûna Yekem) got ku wê "ofîseke mirovî" li Şamê vekiriye bi armanca baştirkirina belavkirina alîkariyan û çavdêrîkirin û hevahegenîkirina programên alîkariyê li ser zemînê, AFP ragihand.
Swîsra wiha dibe yekemîn welatê rojavayî, ji bilî Yekîtiya Ewropayê, ku ofîseke bi vî aweyî vedike ji dema destpêkirina krîza Sûriyê beriya heft salan ve.
"Aniha em xwedan çav û guh in li Şamê," Manuel Bessler, berpirsiyarê hikûmeta Swîsrî bo alîkariyên mirovî, di hevpeyvîneke radyoya SRF de got.
Ofîsa nû, ya ku çend heftiyan berê hatiye vekirin û aniha xwedan yek endamî ye, tu hebûneke siyayî yan diplomasî bo Swîsrayê çênake.
Di şûn de, ew armanc dike ku "çavdêriya diyalogan ji nêztir ve bike bo ewlekiriya rêyên mirovî bo xelkên ziyandar", daxuyaniyeke hikûmetê got.
Ofîs dê herwiha gengaz bike ku "xebat bên xutrkirin bo baştirkirina xizmetguzariyên hewarçûnê û projeyên li ser erdê li Sûriyê bêtir bên çavdêrîkirin", ew tiştê ku aniha cihê baldariya mezintirîn operasyona mirovî ya Swîsrayê ye, daxuyaniyê got.
"Rewşa mirovî li Sûriyê hîna jî alarmdar e û piştgirî pêwîst e ji aliyê civaka navdewletî ve, di nav de Swîsra, aniha ji berê bêhtir," daxuyaniyê got.
Ji dema ku Swîsra balyozgeha xwe di bihara 2012an girt, wê bi awayekî serekî xebatên xwe yên mirovî bi rêya nûneratiyên xwe li Urdun, Libnan û Tirkiyê pêk tanîn, û hikûmetê got ku ew dê lîstina roleke navendî di karê xwe de berdewam bikin.
