http://diyaruna.com/ckb/articles/cnmi_di/newsbriefs/2019/10/03/newsbrief-01

×
×

چاودێرێك: 173 مه‌ده‌نی به‌هۆی مینه‌وه‌ كوژران ئه‌مساڵ له‌ سوریا

لانیكه‌م 173 مه‌ده‌نی كوژراون له‌ سوریا به‌هۆی مینی چێنراو و ته‌قه‌مه‌نیی پاشماوه‌كانی شه‌ڕه‌وه‌ له‌ سه‌ره‌تای ساڵه‌وه‌، ئاژانسی فرانس پرێس پێنجشه‌ممه‌ (3 تشرینی یه‌كه‌م) رایگه‌یاند.

لایه‌نه‌كانی نێو شه‌ڕی سوریا هه‌موویان مینیان له‌ شارۆچكه‌ و دێهاته‌كان چاندووه‌ له‌و كاته‌وه‌ی شه‌ڕه‌كه‌ له‌ 2011 ده‌ستیپێكرد.

نه‌ته‌وه‌ یه‌كگرتووه‌كان ده‌ڵێت له‌ ته‌واوی وڵاته‌كه‌دا ژیانی زیاتر له‌ 10 ملیۆن كه‌س له‌به‌رده‌م مه‌ترسیی ته‌قه‌مه‌نیدایه‌.

رێكخراوی روانگه‌ی سوری بۆ مافه‌كانی مرۆڤ رایگه‌یاند: "له‌ سه‌ره‌تاكانی 2019ه‌وه‌، 173 مه‌ده‌نی، له‌نێویاندا 41 منداڵ، به‌هۆی مینی چێنراو و ته‌قه‌مه‌نیی پاشماوه‌كانی شه‌ڕه‌وه‌ كوژراون."

رێكخراوه‌كه‌ رایگه‌یاند كه‌ له‌نێو ئه‌و قوربانیانه‌دا، لانیكه‌م 40 كه‌سیان له‌كاتی گه‌ڕان به‌دوای ده‌مبه‌ڵاندا بوونه‌ته‌ قوربانی.

نوسینگه‌ی نه‌ته‌وه‌ یه‌كگرتووه‌كان بۆ هه‌ماهه‌نگیكردنی كاروباره‌ مرۆییه‌كان رایگه‌یاند: "هه‌موو رۆژێك مه‌ده‌نییه‌كان ژیانیان له‌ده‌ستده‌ده‌ن یان بریندارده‌بن به‌هۆی مینی چێنراو و ته‌قه‌مه‌نییه‌ نه‌ته‌قیوه‌كانه‌وه‌."

نوسینگه‌كه‌ له‌سه‌ر تویته‌ر راشیگه‌یاند: "به‌خه‌مڵاندن، له‌ هه‌ر سێ رزگاربووی رووداوی ته‌قه‌مه‌نی له‌ سوریا دووانیان به‌ كه‌مئه‌ندامی ژیان به‌سه‌رده‌به‌ن."

رێكخراوی نه‌ته‌وه‌ یه‌كگرتووه‌كان بۆ كاروباری مین رایده‌گه‌یێنێت كه‌ مینه‌كان ده‌بنه‌ "رێگر" له‌به‌رده‌م هه‌وڵه‌كانی پاككردنه‌وه‌ی خۆڵوخاشاك و ده‌ستكردن به‌ چاندنی زه‌وییه‌ كشتوكاڵییه‌كان.

رێكخراوی نه‌ته‌وه‌ یه‌كگرتووه‌كان بۆ كاروباری مین له‌ ئه‌یلولدا به‌ ئاژانسی فرانس پرێسی راگه‌یاند كه‌ مینه‌كان ده‌شبنه‌ هۆی مه‌ترسی بۆ منداڵان و رێگرده‌بن له‌ گه‌ڕانه‌وه‌ی ئاواره‌ سورییه‌كان بۆ شارۆچكه‌ و گونده‌كانی خۆیان.

ئەم بابەتەت بەدڵە؟
0

0 كۆمێنت

رێوشوێنەکانی کۆمێنت نوسین
Captcha