هێزەکانی عێراق هەشت سەرکردەی رێکخراوی "دەوڵەتی ئیسلامی" (داعش)یان لە ئۆپەراسیۆنێکدا لە کەرکوك و دەوروبەری دەستگیرکرد، وەزارەتی بەرگری عێراق چوارشەممە (26 کانونی یەکەم) رایگەیاند.
وتەبێژی وەزارەتەکە، لیوا سەعد مەعەن، لە بەیاننامەیەکدا وتی: "هێزەکانی دژە تیرۆر و یەکەکانی پۆلیسی نێوخۆیی بە پشتبەستن بە چاودێریی بەردەوام ئۆپەراسیۆنێکی گەورەیان ئەنجامدا کە بووە هۆی دەستگیرکردنی هەشت تیرۆرستی داعش."
وتیشی: "دەستگیرکراوان بەتۆمەتی تیرۆریزم داواکرابوون و لە قەزای حەویجەوە بۆ ناوەڕاست و دەوروبەری کەرکوك هەڵهاتبوون دوایئەوەی شارۆچکەکە ئازادکرا."
هەروەها وتی: "ئەوان هەموویان لە هێرشی تیرۆرستی تێوەگلاون، لەنێویاندا کوشتن، دەربەدەرکردنی زۆرەملێیی و هێرشکردنە سەر هێزە ئەمنیەکان."
