هێزەکانی عێراق پێنجشەممە (6 حوزەیران) دژی دواین شەڕکەرە ماوەکانی رێکخراوی "دەوڵەتی ئیسلامی" (داعس) شه‌ڕیانكرد لە شاری موسڵی کۆن کە نەتەوە یەکگرتووەکان رایگەیاند نزیکەی 20,000 مەدەنی لەوێدا گیریان خواردووە و لە "مەترسییه‌كی زۆردان."

وتەبێژی فەرماندەیی ئۆپەراسیۆنە هاوبەشەکانی عێراق، عەمید یەحیا رەسوڵ، بە دیارونای وت هێزە زەمینیەکان سێ حەشارگەی داعشیان تێکشکاند و 13 تیرۆریستیان کوشت لە سێ کۆڵانی ناو گەڕەکی نەجفی.

وتیشی: "هێزەکانی عێراق شەقامی تین و سێ کۆڵانیان ئازادکرد و بەردەوامن لە پێشرەوی لە نەجفی."

رەسوڵ وتی: "نزیکەی 200 مەدەنی، زۆربه‌یان ژن و منداڵ، گوازراونه‌ته‌وه‌ و پێداویستی تەندروستی و خۆراکیان دەستبەجێ بۆ دابینکراوە."

لەگەڵ ئەوەشدا، رێكخه‌ری کاروباری مرۆیی نەتەوە یەکگرتووەکان لە عێراق، لیزا گراندی، بە ئاژانسی فرانس پرێسی وت نزیکەی 20,000 مەدەنی هێشتا لە موسڵی کۆندا گیریان خواردووە.

وتیشی: "به‌پێی خه‌مڵاندنه‌كانی ئێمە لەم قۆناغه‌دا لە دوایین حەشارگەکانی شاری (موسڵی) کۆندا نزیکەی 15,000 مەدەنی، تەنانەت دەشێت زیاتر لە 20,000 هەبێت."

گراندی وتی: "ئەوان لە مەترسی زۆری بۆردومانکردن دان بەهۆی تۆپبارانکردنەكانه‌وە. ئه‌و شەڕکەرانه‌ی (داعش) کە هێشتا لەوێدان، هێشتا راستەوخۆ مەدەنیەکان بەئامانجدەگرن ئەگەر هەوڵبدەن هه‌ڵبێن."