فەرماندەیی ئۆپەراسیۆنە هاوبەشەکانی عێراق هەینی ( 21 نیسان) رایگەیاند هێزە هاوبەشەکانی عێراق زۆربەی گەڕەکەکانی توب و بەیزیان لە رۆژئاوای موسڵ گرتۆتەوە، ئەمەش لەکاتێکدایە کە بەرگری "دەوڵەتی ئیسلامی لە عێراق و شام" (داعش) لە داڕوخاندایە لەو ناوچانەی هێشتا لە ژێر کۆنتڕۆڵی گروپەکەدان.
وتەبێژی فەرماندەییەکە، عەمید یەحیا رەسوڵ، بە دیارونای وت: "شەڕەکان بەردەوامن لەکاتێکدا شکستی گەورە هەیە لەناو چەکدارانی داعشدا."
وتی: "ئێمە 17 تیرۆریستمان کوشتوە و چەندین ئۆتۆمبیلیمان تێكشکاندوه کە پڕكرابوون لە تەقەمەنی لەگەڵ حەشارگەیەکی پڕ لە چەك و فیشەك."
وتی هێزەکانی عێراق هەینی سێ کیلۆمەتر چوونەناو گەڕەکەکانی بەیز و توبەوە. وتیشی کە توانیویشیانە دزەبکەنە ناو هێڵی بەرگریی تیرۆریستەکانەوە لە گەڕەکی مەعامیل و گەڕەکی سیحە.
وتیشی: "لەلایەکی ترەوە ئێمە پردی سەرئاوكهوتوومان داناوە بۆ ئەوەی رێگابکەینەوە بۆ هاوڵاتیان تاوەکو لە شوێنەکانی شەڕەوە بچنە ناوچە ڕزگارکراوەکان لە رۆژهەڵاتی موسڵ."