زیاتر لە 5,000 کەس ماڵەکانیان جێهێشتووە لەوەتەی هێزەکانی سوریای دیموکرات هێرشێکی دەستپێکردووە بۆ سەر رەقەی قەڵای "دەوڵەتی ئیسلامی لە عێراق و شام" (داعش)، ئاژانسی فرانس پرێس پێنجشەممە (10 تشرینی دووەم) رایگەیاند.
وتەبێژی هێزەکانی سوریای دیموکرات، جیهان شێخ ئەحمەد، وتی: "زیاتر لە 5,000 کەسی ئاوارە گەیشتونەتە ئەو ناوچانەی لەلایەن هێزەکانی ئێمەوە ئازادکراون و پارێزراون. ئاوارەکان لە ناوچەکانی شەڕەوە دێن لە رێگەی راڕەوێكەوە کە ئێمە بۆمان کردنەوە."
هێزەکانی سوریای دیموکرات، کە هاوپەیمانییەکە لە هێزی کورد و عەرەب، لە باشورەوە پێشڕەویانکردووە لە ناوچەکانی نزیك سنوری تورکیا بەرەو رەقە و زنجیرەیەك گوندیان گرتووە و گەیشتونەتە 35 کیلۆمەتر نزیك لە شارەکەوە.
چەندین خێزان لە ماڵەکانیان رایانکردووە بەرەو هێڵەکانی هێزەکانی سوریای دیموکرات لەم چەند رۆژەدا.
زۆربەیان لە رێگەی بارهەڵگر و ئۆتۆمبێلەوە گەیشتونەتە دەوروبەری عەین عیسا، کە خاڵی سەرەکی کە ئۆپەراسیۆنەکەی لێوە دەستپێکردووە کەوتۆتە 50 کیلۆمەتر باکوری رەقەوە، کە کەلوپەلیان بارکردووەو هەندێکیشیان مەڕوماڵاتیان هێناوە وەك مانگا و مەڕ.
هێزەکانی سوریای دیموکرات ئاوارەکانی لە دوری چەند کیلۆمەترێك لە عەین عیسا راگرتووە، بۆ پشکنینی ناسنامە و کەلوپەلەکانیان.
ئەحمەد داوای کۆمەکی کرد لە ئامادەباشیدا بۆ لێشاوی ئاوارەکان، کە پێدەچێت زیاد بکات لەگەڵ گەیشتنی هێزەکانی سوریای دیموکرات بەرەو رەقە.
هەروەها وتی: "پێویستیمان بە هاوکاری نێودەوڵەتی هەیە چونکە تواناکانمان سنوردارن و، لەگەڵ هاتنی زستان، هیچ کەمپێك نیە بۆ لەخۆگرتنیان."