http://diyaruna.com/ckb/articles/cnmi_di/features/2019/09/10/feature-02

×
×
ئابوری |

دابەزینی زۆری بەهای لیرە سورییەکان برسی ده‌كات

وەلید ئەبولخەیر لە قاهیرە

هاوڵاتییەکی سوری دراو دەگۆڕێتەوە لە نوسینگەیەکی ئاڵوگۆڕی دراو لە ناوچەی ئیدلیب. [خاوەنی وێنە: هەیسەم ئیدلیبی]

چالاکوانێکی ناوچەکە وتی نرخی شمه‌ك بەرزبوونەوەی بێوێنەی بەخۆوە بینیووە لە هەموو بەشەکانی سوریا دوای دابەزینێکی مێژوویی بەهای لیرەی سوریبەرامبەر دراوە بیانییەکان، کە تەواو لە توانای خێزانەکانی داوە بۆ دابینکردنی پێداویستیە بنەڕەتیەکان.

پارێزەری سوری، بەشیر بەسام بە دیارونای وت بەهای لیرەی سوری له‌به‌رامبه‌ر دراوە بیانییەکان دابەزیوە، بەجۆرێك بەهای کڕینی یەك دۆلار 680 لیرەی سورییە و بەهای فرۆشتنی یەك دۆلار 685 لیرەی سورییە.

وتی نرخەکان زیاتریش بوون لە هەندێك ناوچەی دەرەوەی دیمەشق، كه‌ گه‌یشتوونه‌ته‌ رادەی 700 لیرە، کە ئاستێکە هەرگیز لەکاتی ئەم قەیرانەدا نەبینراوە و ئاماژەیکرد بەوەی پێشتر بەهای لیرە لە 500 لیرەدا بەرامبەر یەك دۆلار وەستابوو.

ئەو بەرزبوونەوەی نرخی لیره‌یه‌شی گەڕاندەوە بۆ چەندین هۆکاری ئاڵۆز، کە لەپێشترینیان خراپبوونی دۆخی گشتیی ئابورییە لە سوریا لە ئەنجامی شەڕی هەشت ساڵەدا، کە هێشتا بەردەوامە.

داڕمانی بەهای لیرەی سوری کاریگەریی هەبووە بۆ سەر نرخی شتومەك. [خاوەنی وێنە: هەیسەم ئیدلیبی]

هاوڵاتیانی سوری لە دوکانێکی حەواڵە و ئاڵوگۆڕی دراو چاوەڕوانن لە ناوچەیەکی باکوری حەلەب. [خاوەنی وێنە: هەیسەم ئیدلیبی]

بەسام وتی: "ئەمە لە ئەنجامی زیادبوونی خەرجییەکانی حکومەتدایە بۆ شەڕ لەجیاتی پشتیوانیكردنی لە کەرتە سەرەکییە بەرهەمهێنەرەکانی وڵات."

وتی یەکێکی دیکە لە هۆکارەکان نەمانی گەشتیارییە، لەگەڵ پەنابردنی بازرگانان بۆ بازاڕی رەش بۆ کڕینی دۆلار بۆ پارەدان بەرامبەر هەناردەکانیان، لەبەرئەوەی بانکی ناوەندی رەتیدەکاتەوە دراوی بیانی بداتە بازرگانان.

ئاماژەیکرد بەوەش كه‌ هاوکات، بەهای فەرمیی دراو بۆ گۆڕینەوە بەرامبەر 435 لیرە دانراوە، کە مانای وایە ئەو هاوڵاتیانەی کە موچەیان بە دۆلار پێدەگات 30 لەسەدای بەهای پارەکەیان لەکیسدەچێت بەهۆی جیاوازیی زۆره‌وه‌ لە نرخەکەیدا.

وتی ئەم دابه‌زینه‌ی بەهای لیرە کاریگەریی راستەوخۆ و زیانبەخشی هەیە بۆ سەر خەڵکی سوریا، کە شایەتی بەرزبوونەوەی شمەکە سەرەتاییەکانن، بەتایبەتی خۆراك، بەجۆرێك كه‌ لە کڕین نایەت.

بەسام ئاماژەیکرد بەوەی خەرجیی مامناوەندیی خێزانێکی سوری نزیکەی 250,000 لیرەی سورییە (485 دۆلار)، لەکاتێکدا موچەی مامناوەندی 45,000 لیرەی سورییە (60 دۆلار).

وتی ئەمە مانای وایە کارمەندانی حکومەت لەئێستادا رۆژانە نزیکەی 2 دۆلار بەدەستدەهێنن.

بەسام وتی هاوکات، حکومەت بەرزکردنەوەی موچەی کەرتی گشتی رەتدەکاتەوە و بێدەنگ ماوەتەوە بەرامبەر جارێکی دیکە بەرزبوونەوەی نرخ.

ئەم بابەتەت بەدڵە؟
1

0 كۆمێنت

رێوشوێنەکانی کۆمێنت نوسین
Captcha