http://diyaruna.com/ckb/articles/cnmi_di/features/2019/08/16/feature-03

×
×
ئاساییش |

نزیکبوونەوەی هێزەکانی رژێم لە شارۆچکەیەکی سەرەکیی ئیدلیب ئاوارەبوونی به‌كۆمه‌ڵی لێدەکەوێتەوە

وەلید ئەبولخەیر لە قاهیرە و ئاژانسی فرانس پرێس

چەندین خێزان لە چەند رۆژی رابردوودا لە پارێزگای ئیدلیب هەڵهاتوون لەناو ئەم لۆریانەدا كه‌ پڕکراون لە شمەکەکانیان. [وێنەكه‌ لە تۆڕە کۆمەڵایەتیەکان بڵاوکراوه‌تەوە]

چالاکوانێکی ناوخۆ بە دیارونای وت شەڕ لە دێهاتەکانی ئیدلیب بۆتە هۆی ئاوارەبوونی دانیشتووانەکە بەرەو ناوچە ئارامەکان لە چەند رۆژی رابردوودا.

چالاکوانێكی ئیدلیب، هه‌یسه‌م ئیدلیبی هەینی (16 ئاب) وتی بەردەوامیی هێرشە ئاسمانییەکان لەلایەن فڕۆکەکانی رژێم و روسیاوە لەگەڵ پێشڕەویکردنی هێزەکانی رژێم بەرەو شارۆچکەی ستراتیژیی خان شەیخون لە باشوری پارێزگای ئیدلیب بوونەتە هۆی کۆڕەوی دانیشتووانەکە.

شارۆچکەکە دەکەوێتە سەر رێگایەکی خێرا کە رژێم زۆر دەخوازێت بیخاتە ژێردەستی خۆی، چونکە بەناو ئیدلیبدا تێده‌په‌ڕێت و ناوچەکانی ژێردەستی رژێم بە باکوری حەلەبەوە دەبەستێتەوە.

بەدرێژایی هەفتەی رابردوو، چەکدارانی سەر بە رژێم پێشڕەوییان کردووە لە رۆخی باشوری ئیدلیب کە دەکەوێتە ژێردەستی هاوپەیمانی توندڕەوەی تەحریر شام.

چەکدارێك لە ناوچه‌ گوندنشینه‌كانی باشوری ئیدلیب پارچەیەکی لە پاشماوەی ئەو فڕۆکە سەربازییە سورییە بەدەستەوە گرتووە کە نزیك خان شەیخون خرایە خوارەوە له‌ 14 ئاب. [وێنەكه‌ لە تۆڕە کۆمەڵایەتیەکان بڵاوکراوەتەوە]

ئیدلیبی وتی: "خان شەیخون ئێستا گەمارۆدراوە لە رۆژهەڵات و رۆژئاواوە." ئاماژەی بۆ ئەوەش کرد كه‌ ژمارەیەك شارۆچکە و گوندی چواردەوریشی کەوتوونەتە ژێردەستی رژێم و میلیشیا هەوادارەکانی، وەك حەرش هوبه‌یت، موغر حونتە، عابدین، مەردەم و تەل لارجە.

وتی شەڕەکە سەختە لە هەرێمەکە و دەنگی تەقینەوە لە تەواوی پارێزگاکە دەبیسترێت، چونکە تەحریر شام ئۆتۆمبیلی بۆمبڕێژکراو و خۆکوژ بەکاردەهێنێت وەك بەشێك لە هەوڵەکانی بۆ وەستاندن یان دواخستنی پێشڕەویەکانی رژێم.

بەگوێره‌ی روانگەی سوری بۆ مافەکانی مرۆڤ، شەڕ پێنجشەممە کوژرانی 24 چەکداری ئۆپۆزسیۆن و هاوپەیمانە توندڕەوەکە و 20 چەکداری رژێمی لێکەوتەوە.

روانگەکە رایگه‌یاند كه‌ هێرشە ئاسمانییەکانی رژێم یەك مەدەنیشیان کوشتووە لە باشوری ئیدلیب.

چەکدارانی تەحریر شام چوارشەممە فڕۆکەیەکی رژێمیان خستە خوارەوە لە خان شەیخون، فڕۆکەوانەکەشیان بە دیل گرت.

لە ڤیدیۆیەکدا کە هاوپەیمانییەکە پێنجشەممە بڵاویکردەوە و گوایە فڕۆکەوانە دیەلەکە نیشاندەدرێت، فڕۆکەوانەکە خۆی وەك موقەدەم محەمەد ئەحمەد سلێمان لە هێزی ئاسمانیی سوری دەناسێنیت.

'ترس'

هەر چوارشەممە، هێرشی ئاسمانی نۆ مەدەنیی کوشت و قوربانییەکان کارمەندێکی فریاکەوتنی پزیشکی و شۆفێری ئۆتۆمۆبیلی فریاکەوتن و کارمەندێکی رزگارکردنیان تێدابوو، ئەوەش وایکرد نەتەوە یەکگرتووەکان بە پەلە ئیدانەی تووندوتیژییەکە بکات.

جێگری رێكخه‌ری مرۆیی ناوچه‌یی بۆ قەیرانی سوریا لە نەتەوە یەکگرتووەکان، مارك کەتس وتی: "هێرشەکەی چوارشەممە جارێکی دیکە تیشك ده‌خاته‌سه‌ر ترسی ئه‌وه‌ی ئاخۆ چی رووده‌دات لە ئیدلیب و باکوری حەما، کە تیایاندا سێ ملیۆن مەدەنی گیریانخواردووە و ستافی پزیشکی و هاوکاریی مرۆیی و کارمەندانی رزگارکردنیش بەردەوامن لە باجدان بە ژیانی خۆیان لەکاتی هەوڵەکانیاندا بۆ هاوکاریکردنی ئەوانی دیکە."

به‌گوێره‌ی روانگەی سوری، بۆردومان و هێرشە ئاسمانییەکانی رژێم و روسیا لە کۆتایی نیسانەوە زیاتر لە 820 مەدەنییان کوشتووە.

راشیگه‌یاند كه‌ زیاتر لە 1,300 چەکداری ئۆپۆزسیۆن و تووندڕەو -- لەگەڵ 1,150 کەس لە هێزەکانی رژێم -- لە هەمان ماوەدا کوژراون.

تووندوتیژییەکان بوونەتە هۆی ئاوارەبوونی 400,000 کەس، بەگوێره‌ی ئاماری نەتەوە یەکگرتووەکان.

ئەم بابەتەت بەدڵە؟
2

0 كۆمێنت

رێوشوێنەکانی کۆمێنت نوسین
Captcha