هه‌واڵه‌كانی عێراق
هەڵبژاردن

هەڵبژاردنێك له‌ موسڵ نیگەرانی دروستدەکات دەربارەی میلیشیاکان

فارس عومران

پارێزگاری نوێی نەینەوا، مەنسور مەرعید جبوری کە لێرەدا لە 7 شوبات دەبینرێت، تۆمەتبارکراوە بە بوونی پەیوەندی لەگەڵ میلیشیاکانی سەر بە ئێران. [وێنەکە لەسەر تۆڕە کۆمەڵایەتیەکان بڵاوبۆتەوە]

پارێزگاری نوێی نەینەوا، مەنسور مەرعید جبوری کە لێرەدا لە 7 شوبات دەبینرێت، تۆمەتبارکراوە بە بوونی پەیوەندی لەگەڵ میلیشیاکانی سەر بە ئێران. [وێنەکە لەسەر تۆڕە کۆمەڵایەتیەکان بڵاوبۆتەوە]

هەڵبژاردنی پارێزگارێکی نوێ بۆ نەینەوا ئەو پارێزگایەی باکوری عێراقی تووشی گێژاو کردووە، بەجۆرێك دانیشتوان و چاودێران ئاماژە بەوە دەکەن گوایە پەیوەندیی هەیە بە میلیشیاکانی سەر بە ئێرانەوە لەگەڵ تۆمەتی گەندەڵی له‌كاتی پرۆسەی هەڵبژاردنەکەدا.

پەرلەمانتاری عیراقی، مەنسور مەرعید جبوری، کە نوێنەری نەینەوایە لە پەرلەمان، لە 13 ئایار هەڵبژێردرا بە پارێزگار لەلایەن ئەنجومەنی پارێزگای نەینەواوە بە 28 دەنگ لە کۆی 39 دەنگی پەرلەمانتاران.

سیروان محەمەد لە پارتی دیموکراتی کوردستان (پدك) بە جێگری یەکەمی جبوری هەڵبژێردرا و دەنگدان لەسەر جێگری دووەم دواخرا.

ئەنجامەکە لەلایەن هەندێك لە ئەندامانی پەرلەمانەوە رەتکرایەوە و بەرهەڵستکاریی بەهێزی بۆ دروستبوو لەلایەن خەڵکی نەینەواوە، کە داوایان لە حکومەت کرد بۆ دەستێوەردان تا شانەی قەیران کاروباری پارێزگاکە بەڕێوەببات.

ئەم وێنەیە، کە 13 ئایار لەسەر ئینتەرنێت بڵاوکرایەوە، هەڵبژاردنی مەنسور مەرعید جبوری نیشاندەدات وەك پارێزگاری نەینەوا. [خاوەنی وێنە: ناوەندی رۆژنامەوانی نەینەوا]

ئەم وێنەیە، کە 13 ئایار لەسەر ئینتەرنێت بڵاوکرایەوە، هەڵبژاردنی مەنسور مەرعید جبوری نیشاندەدات وەك پارێزگاری نەینەوا. [خاوەنی وێنە: ناوەندی رۆژنامەوانی نەینەوا]

لە مانگی ئازاردا شانەیەکی قەیران دامەزرێندرا، دوای ئەوەیپارێزگاری پێشووی نەینەوا نەوفەل عاگوب لەسەرکار لابرالەسەر رووداوی بەلەمەکەی موسڵ کە زیاد لە 100 کەس تیایدا گیانیان لەدەستدا. شانەی قەیران لە 28 ئایار هەڵوەشێندرایەوە.

لێکۆڵینەوە لەو رووداوە تیشکی خستە سەر ئەو گەندەڵییەی کە بڵاوبۆتەوەلەو ناوچانەی عێراق کە میلیشیاکانی سەر بە ئێران هه‌ژمونیان تێیاندا هەیە.

پرسیار دەربارەی هەڵبژاردن

دانیشتوویه‌كی موسڵ، ئەبو ویسام، کە داوایکرد ناوی راستەقینەی بەکارنەهێنرێت، بە دیارونای وت هەڵبژاردنی جبوری "نایاسایی" بوو، هه‌روه‌ها داوای هەڵوەشاندنەوەی ئەنجومەنەکەی کرد و ئەندامانی تۆمەتبارکرد بە گەندەڵی.

روونیکردەوە كه‌ ئەرکی ئەنجومەنەکە "دووساڵ لەمەوبەر بەسەرچوو، دوای کۆتاییهاتنی مافی دەستووریی بۆ فەرمانڕەوایی، کە چوار ساڵە".

داوایکرد هەڵبژاردنی پارێزگار هەڵبوەشێنرێتەوە و له‌قه‌ڵه‌میدا بەوەی "دژی ویستی خەڵکە" و داوایکرد کارگێڕیی پارێزگاکە بدرێتەوە دەست شانەی قەیران، تا ئەوکاتەی هەڵبژاردنێکی دادپەروەروانە ئەنجامدەدرێت.

پارێزگاری نوێ ئەندامێکی چالاکی بزووتنەوەی عەتایە، کە لەلایەن فالح فەیازی سه‌ركرده‌ی هێزەکانی حەشدی شەعبییەوە بەڕێوەدەبرێت، کە چه‌ند میلیشیایه‌كی سەر بە ئێرانی تێدایە.

دانیشتوانی نەینەوا و چاودێران بە دیارونایان وت دەترسن ئەم هەڵبژاردنە ببێتە هۆی دەسەڵاتی زیاتر بۆ میلیشیاکان بەسەر سەرچاوەکانی پارێزگاکەیاندا و بەربەست بخاتە بەردەم لێکۆڵینەوەکان لە حاڵەتەکانی گەندەڵیدا.

شیکاروانی ستراتیژی و خەڵکی نەینەوا، موئەیەد جوحەیشی بە دیارونای وت: "گومانی ئەوە هەیە هەندێك لە ئەندامانی ئەنجومەنی پارێزگای نەینەوا کە دەنگیان بە پارێزگاری نوێ دا بەرتیلی گەورەیان بەدەستگەیشتبێت."

وتی: "تۆمەتی وەها هەیە کە زیاد لە کەسایەتییەکی سیاسی پشتڕاستیدەکه‌نەوە بەوەی ملیۆنان دۆلار دراوە بەم ئەندامانە تا دەنگ بدەن بە جبوری وه‌ك پارێزگار، كه‌ لەلایەن میلیشیاکانەوە پشتیوانیکراوه‌."

وتیشی: "خەڵکی نەینەوا زۆر تووڕەن لە ئەندامانی ئەنجومەن، کە داواکارییەکانیان بۆ بە بەرپرسڕاگرتنی بەرپرسانی گەندەڵ و رێگرتن لە ئەندامانی ئەم میلیشیانە بۆ ئەنجامدانی کردەی گەندەڵی زیاتر لەبیرکردووە."

هه‌روه‌ها وتی: "خەڵك نائومێدن و تووڕەن لە ئەنجامی ئەم هەڵبژاردنە، کە تەنیا دەبێتە هۆی بارگرژیی زیاتر."

نیگەرانی لە میلیشیاکان

پارێزگاری پێشووی نەینەوا، ئەسیل نوجەیفی وتی خەڵکی مەدەنیی پارێزگاکە مافی خۆیانە نیگەران بن لەوەی میلیشیاکان دەسەڵاتی زیاتریان هەبێت لە نەینەوا و بەتەواوی زاڵبن بەسەر پرۆسەی دروستکردنی بڕیاردا".

بە دیارونای وت: "ئەم ترسە رەوایە."

وتی: "بەڵام دەبێت هانی خەڵك بدەین بەرەنگاری ئەو هەستە ببنەوە و لەجیاتی ئەوە متمانە بە توانای خۆیان بەهێزبکەن بۆ گۆڕینی دۆخەکە و رێگرتن لە میلیشیاکان لەوەی دەست بەسەر نەینەوادا بگرن به‌ رێگه‌ی ئاشتیانە."

نوجەیفی وتی بڕوای وایە کە رێگەی گۆڕین دەستپێدەکات بە پێویستیی "پشتیوانیكردنی داوای جەماوەری بۆ خێرا رێکخستنی هەڵبژاردنی ناوخۆیی کە ئەنجومەنێکی نوێی پارێزگا و حکومەتێکی خۆجێی پێكده‌هێنێت".

پێشنیازی ئەوەی کرد کە دەسەڵاتی خۆجێی وەك "کارگێڕیی کاربەڕێکەر" لەقەڵەمبدرێت تا هەڵبژاردن رێکدەخرێت و جەختیکردەوە لەوەی پارێزگاکە "زۆر کێشەی بۆ دروستبووە و هەڵبژاردنی ناوخۆیی زۆر گرنگە بۆ چارەسەرکردنی ئەم کێشانە".

پەرلەمانتاری عێراقی، عەبدولڕەحمان لوەیزی کە نوێنەری نەینەوایە لە پەرلەمان، بە دیارونای وت فەزای سیاسیی پارێزگاکە کێشەی زۆری تێدایە و قەوارە سیاسییەکان بەدەست رکابەرییەوە دەناڵێنن.

وتی ئەم کێشانە "ئاستەنگی بەرچاو" دروستدەکەن بۆ هەر کارگێڕییەکی خۆجێی و ئاماژەیکرد بەوەی کێشەش هەیە لە دەسەڵاتی کوردا بەسەر چەند ناوچەیەکدا، لەگەڵ باشکردنی پەیوەندی لەنێوان حکومەتی فیدراڵ و حکومەتە خۆجێیەکاندا.

وتیشی: "حکومەتی ئێستا، بە پەیوەندیی بەهێزییەوە بە بڕیاربەدەستانی بەغدا، رەنگە بتوانێت بەسەر هەندێك لەم کێشە ئاڵۆزانەدا زاڵبێت."

بەڵام شیکاروانانی وەك جوحەیشی هاوڕا نین.

جوحەیشی وتی: "چی لەم پارێزگاره‌ نوێیە چاوەڕوان بکەین جگە لەوەی شوێنپێی ئەوەی پێش خۆی هەڵبگرێت، عاگوب، کە دەبێتە هۆی مەینەتی زیاتر بۆ خەڵکەکە بەهۆی گەندەڵی و فەرمانڕەوایی خراپ، فەرامۆشکاری، خراپ جێبەجێکردنی پرۆژە خزمەتگوزارییەکان و نەبوونی کۆنترۆڵ و بەرپرسیارێتیه‌وه؟"

وتیشی: "ئەمە دەسەڵاتی زیاتر دەبەخشێتە ئەو میلیشیانەی کە چالاکن لە پارێزگاکەدا -- وەك عەسائیب ئەهل حەق، حەرەکه‌ت نوجەبا، کەتائیب حیزبوڵا و سەرایا خوراسانی -- وه‌ك له‌ پێشتر بۆ دزینی پارەی تەرخانکراو بۆ بنیاتنانەوە و سەرچاوە نیشتمانییه‌كان لەڕێی نوسینگه‌ ئابورییەکانیانەوە."

وتی ئەم میلیشیانە لەئێستادا سەرقاڵن بە رێگرتنه‌وه‌ لە لێکۆڵینەوە لە رووداوی بەلەمەکە "هه‌روه‌ها داپۆشینی ئەو کەیسە بۆ هەمیشە".

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500