هه‌واڵه‌كانی عێراق
کۆمەڵگا

'شەقامی کلتور' دیمەنی هونەریی فەلوجە دەبوژێنێتەوە

سەیف ئەحمەد لە ئەنبار

شاعیرێکی عێراقی هۆنراوه‌یه‌ك دەخوێنێتەوە لەکاتی کردنەوەی پرۆژەی شەقامی کلتوردا لە شاری فەلوجەی پارێزگای ئەنبار. [سەیف ئەحمەد / دیارونا]

شاعیرێکی عێراقی هۆنراوه‌یه‌ك دەخوێنێتەوە لەکاتی کردنەوەی پرۆژەی شەقامی کلتوردا لە شاری فەلوجەی پارێزگای ئەنبار. [سەیف ئەحمەد / دیارونا]

هەموو هەفتەیەك، نوسەران و هونەرمەند و شاعیرانی عێراقی بەیەکدەگەن لە کەناری رووباری فورات لە شاری فەلوجەی پارێزگای ئەنبار بۆ بەشداریکردن لە بۆنەیەكدا کە پێیدەڵێن "شەقامی کلتور".

ئەو گردبوونەوە هەفتانەیەی هونەرمەندان و بیرمەندان لە بەشی خۆرئاوای شارەکە بەشێکە لە هەڵمەتێکی خۆرسکانە بۆ بوژاندنەوەی دیمەنی هونەری و ئەدەبیی شارەکە دوای دەرکردنی رێکخراوی "دەوڵەتی ئیسلامی" (داعش).

هونەرمەندان زۆرترین سوود لەو دەرفەتە دەبینن بۆ نیشاندانی کارەکانیان و بەشداربوون لە چالاکییە کلتورییەکاندا لەگەڵ دانیشتوانی فەلوجە و بەشەکانی دیکەی عێراق.

سەرپەرشتیاری پرۆژەکە عەبدولسەلام حسێن محەمەدی کە خۆی شاعیرە، وتی کۆمەڵگەی هونەرمەندان و ئەدیبانی فەلوجە زۆر کاریانکردووە بۆ دامەزراندنی شەقامی کلتور.

گەنجێکی فەلوجە کتێب دەفرۆشێت لە بۆنەی هەفتانەی شەقامی کلتوردا لەسەر کەناری رووباری فورات. [سەیف ئەحمەد / دیارونا]

گەنجێکی فەلوجە کتێب دەفرۆشێت لە بۆنەی هەفتانەی شەقامی کلتوردا لەسەر کەناری رووباری فورات. [سەیف ئەحمەد / دیارونا]

پرۆژەکە ئیلهامی لە شەقامی موتەنەبی سەرنجڕاکێشی بەغداوە وەرگرتووە -- کە شەقامێکی مێژووییە و پڕە لە کتێبخانە و کافێ کە پەناگەی نوسەران و بیریاران بووە.

بە دیارونای وت ئەمە رەتکردنەوەی بیری توندڕەوییە و ئاماژەیکرد بەوەی فەلوجە "شاری کلتور و زانستە، لەکاتێکدا داعش دژی زانست و شیعر و شانۆیە".

وتی گروپەکە هەموو نمایشێکی کلتوریی رەتدەکردەوە كاتێك كه‌ فەرمانڕەوا بوو.

هەروەها کتێبی سوتاند و گڕی بەردایە کتێبخانە مێژووییەکانلە ناوچەکانی وەك موسڵ.

محەمەدی وتی جیا لە فەلوجە، شەقامی کلتور لە چەند قەزایەکی دیکەی ئەنبار کۆپیکرا، بەجۆرێك بۆنەکان هەموو هەینییەك ئەنجامدەدرێن تا كاتژمێر یه‌كی شەو.

سەرەڕای رەفەی کتێب و خوێندنەوەی شیعر، چالاکی وەك بازاڕی خێرخوازی بەڕێوەدەچێت و پارە کۆکراوەكه‌ی دەدرێتە ئەو خێزانانەی کەسێکیان لەلایەن داعشەوە کوژراوە.

بەرەنگاربوونەوەی داعش

ئەندامی ئەنجومەنی پارێزگای ئەنبار، ئەمیرە عودەی بە دیارونای وت فیستیڤاڵی هەفتانەی شەقامی کلتور "دەستکەوتێکی بەرچاوە لە بەرەنگاربوونەوەی داعش".

وتی هۆڵی فیستیڤاڵەکە، کە ئێستا سەکۆیەکی کلتوری و ئەدەبی و مرۆییە، پێشتر ناوچەیەك بوو کە ئەندامانی داعش مەدەنیەکانیان لێ دەکوشت و ئەشکەنجە دەدا و جەستەکانیان دەخستنە فوراتەوە.

عودەی وتی دەسەڵاتدارانی خۆجێی ئەنبار یارمەتی بەڕێوەبردنی پرۆژەکە دەدەن و پشتیوانی لە چالاکیەکانی دەکەن، ئاماژەیکرد بەوەی ژنانیش بەشداریی بۆنە کلتورییەکان دەکەن وەك شاعیر و وێنەکێش و وێنەگر.

وتی: "نمایشگای تابلۆ و پەیکەرتاشی لەگەڵ سەکۆی ئازاد، کاری دەستی، كوشكی خێرخوازی، شوێن بۆ کاری خێرخوازی، کێبڕکێی هونەری و ئەدەبی، هەموو ئەم شتانە لە شەقامی کلتور لە فەلوجە هەن."

قائیمقامی فەلوجە عیسا سایەر بە دیارونای وت: "هەموو ئاسانکارییەك و مۆڵەتێکی ئەمنیمان داوە بە شەقامی کلتور."

"شەقامەکە" لە پردی ستیلی فەلوجەوە درێژدەبێتەوە بۆ پردی نوێ، بەدرێژایی کەناری رووباری فورات لە بەشی خۆرئاوای شارەکە.

وتی: "بینیوومانە خەڵکێکی زۆری ناوچەکە دێن بەدەم بۆنەکانی شەقامی کلتورەوە." ئاماژەیکرد بەوەی بەتایبەتی بەرهەمە شانۆییەکان و خوێندنەوەی شیعر جەماوەریین.

وتیشی بەشدارییەکی بەهێزی خوێندکارانیش دەبینرێت.

'پەیامی ئاشتی'

وتی نوێنەرانی پارێزگاکانی دیکەی عێراق چاوەڕواندەکرێت بەشداریبکەن لە بۆنە کلتورییەکانی "شەقامەکەدا"، کە گروپە کەمینەکانی عێراقیش لەخۆدەگرن.

وتیشی پرۆژەکە "سەرکەوتووبووە لە ناردنی پەیامی ئاشتی و برایەتی لەنێو گەلی عێراقدا و لەڕێگەی بیر و ئەدەب و مەعریفەوە".

رۆژنامەوان نەبی عەزامی وتی: "شەقامی کلتور پرۆژەیەکی زیندووی سەرکەوتووە و لەسەر مۆدێلی شەقامی موتەنەبی بنیاتنراوە، بە ئامانجی بڵاوکردنەوەی کلتور."

بە دیارونای وت: "ئەدای سەرنجڕاکێشی شانۆیی و کۆمیدی" بەشدارییدەکەن لە گەڕاندنەوەی کەشێکی ئەرێنی بۆ شارەکە.

وتی دانیشتوانی فەلوجە تاکە سوودمەند نین لێی و ئاماژەیکرد بەوەی "زۆر هونەرمەند و نوسەر و رۆماننوس لەگەڵ بیرمەند لە قەزاکانی دیکەی ئەنباره‌وه‌، وەك رەمادی و هیت و حەدیسە، بەشداریدەکەن".

بەڕێوبەری ناوەندی ژنان لە فەلوجە جینان عانی وتی: "شەقامی کلتور بۆتە سەکۆ و شوێنی گۆڕینەوەی بیرۆکەی ئەدەبی و شیعری و مەعریفە و پسپۆڕی."

وتیشی: "ژنان بەشدارییەکی بەهێزیان هەبووە لە چالاکیەکانی شەقامی کلتوردا." ئاماژەیکرد بەوەی سەرەڕای پێشانگای كاری دەستی و بازاڕی خێرخوازی، هونەرمەندانی مێینە کاری هونەری و شیعریی خۆشیان نمایشکردووە.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500