http://diyaruna.com/ckb/articles/cnmi_di/features/2019/01/14/feature-01

×
×

تێرۆریزم |

تەحریر شام زه‌نگی مەترسی لێده‌دات لە باکوری سوریا

وەلید ئەبولخەیر لە قاهیرە

له‌ڕێگای تویته‌ره‌وه‌ په‌یوه‌ندی بكه‌ لەڕێگەی فەیسبووکەوە پەیوەندی بکە

ماڵێك لە دەوروبەری ئیدلیب ئەم وشانەی لەسەر نوسراوە 'ئەم ماڵە لەلایەن تەحریر شامەوە دەستی بەسەردا گیراوە'، چونکە خاوەنەکەی دژی ئەو هاوپەیمانێتیە توندڕەوە بووه‌. [خاوەنی وێنە: موسعەب عەساف]

چالاکوانێکی ئیدلیب وتی تەحریر شام بەردەوامە لە بەهێزکردنی دەسەڵاتی بەسەر ناوچەكانی باکوری سوریادا دوای رێککەوتنی ئاگربەست لەگەڵبەرەی رزگاری سوریاو دەستبەسەر دەزگا ئابوری و سەربازییەکاندا دەگرێت.

چالاکوانی خه‌ڵكی ئیدلیب، موسعەب عەساف بە دیارونای وت بەڵام دانیشتوان ئەم هەنگاوە فراوانخوازییانە رەتدەکەنەوە، کە بۆتە هۆی هەڵپەساردنی ئەنجومەنە خۆجێیەکان و پۆلیسی ئازادی ئیدلیب لەگەڵ دەستبەسەراگرتنی ماڵ و موڵکیان.

ئاژانسی فرانس پرێس رایگەیاند كه‌ هاوپەیمانێتی نیشتمانی سوریاش بەهەمان شێوە، کە گەورەترین پێکهاتەی ئۆپۆزسیۆنە، یەکشەممە (13 کانونی دووەم) سەرکۆنەی هەوڵەکانی تەحریر شامی کرد بۆ "دەستبەسەراگرتن"ی هەموو ناوچەکە.

ئەندامانی تەحریر شام لەبەردەم بازگەیەکی ئەمنیدا وەستاون کە لە گروپێکی رکابەریان سەندووە لە دەوروبەری ئیدلیب. [خاوەنی وێنە: موسعەب عەساف]

هاوپەیمانێتیەکە لە بەیاننامەیەکدا دوای کۆتاییهاتنی کۆبوونەوەیەك دەربارەی دوایین گۆڕانکارییەکانی سوریا رایگەیاند: "پێویستە چارەسەرێکی ریشەیی بدۆزرێتەوە بۆ کۆتاییهێنان بە بوونی ئەوان لە ئیدلیب و هەر ناوچەیەکی دیکە."

ماوەیەکە ئیدلیب بەهۆی ناوچەیەکی ئارامەوە پارێزراوە بە رێکەوتنێکی نێوان تورکیا و روسیا کە لە ئەیلول بەسترا، بۆ رێگرتن لە هێرشی رژێم بۆ گرتنەوەی ناوچەکانی باکور لە چەکدارانی ئۆپۆزسیۆن.

وەك بەشێك لە رێکەوتنەکە، وا دانرابوو گروپە توندڕەوەکانی وەك تەحریر شام لە ناوچەی لەچەکداماڵراو بکشێنەوە لە ناوەندی تشرینی یەکەم، بەڵام هەرگیز نەکشانەوە.

هەڕەشەی زیاتر بۆ سەر ناوچەکە

دەستبەسەراگرتنه‌كه‌ی تەحریر شام هەڕەشەی هێرشکردنی رژێم زیندوودەکاتەوە.

ئەمە وای لە هاوپەیمانێتی نیشتمانی كرد داوای رێککەوتن لەگەڵ تورکیا بکات بۆ پاراستنی مەدەنیەکان و "رێگرتن لە رژێم و پشتیوانەکانی، روسیا و ئێران، [لە پێشڕه‌ویكردنی] جینۆسایدێك لەژێر ناوی بوونی تیرۆریستاندا لە ناوچەکە".

عەساف وتی لەڕێی رێکەوتن لەگەڵ بەرەی سوریای ئازادەوە، تەحریر شام دەستی بەسەر ناوچەکانی مەعەرەت نوعمان و جەبەل زاویە و ئەریحادا گرت.

بە دیارونای وت: "لەئێستادا تەحریر شام دەسەڵاتی تەواوی بەسەر ناوچەکانی باکوردا هەیە، لەنێویاندا ئیدلیب و ناوچەکانی دەوروبەری پارێزگاکانی حەما و حەلەب."

بەگوێرەی ئەم رێکەوتنە، تەحریر شام و بەناو "حکومەتی رزگاری"یەکەی، کە باڵه‌ سیاسیەكه‌یه‌تی، هەموو ئەرکە کارگێڕییەکان دەگرنەدەست.

پۆلیسی ئازادی ئیدلیبهەڵوەشانەوەی خۆی و داخستنی بنکەکانی راگەیاندووە.

عەساف وتی بە هەزاران چەکداری ئۆپۆزسیۆن، كه‌ زۆربەیان چەکداری ئەحرار شام و سوقور شامن، بڕیاریاندا بچنەناو ناوچەی عەفرینه‌وه‌ لەجیاتی پەیوەندیکردن بە تەحریر شامەوە، کە لەژێر بەندەکانی رێککەوتنەکەدا پارێزراوە.

شارەکان هەڵوەشانەوەی پۆلیسی ئازاد رەتدەکەنەوە

عەساف وتی یەکێك لە ئاکامەکانی فراوانخوازیی تەحریر شام راگەیاندنی خۆهەڵوەشاندنەوەی پۆلیسی ئازادە.

وتی پۆلیسی ئازاد کارگێڕیی ئەمنی و کۆمەڵایەتی لە چەندین ناوچە بەڕێوەده‌برد و لەئێستادا جێیان گیراوەتەوە بە حیسبەی تەحریر شام (پۆلیسی ئایینی).

بەڵام هەندێك شار هەڵپەساردنی کاری پۆلیسی ئازادیان رەتکردۆتەوە و رایانگەیاندووە کە هێزەکانی پۆلیسیان بەچالاکی دەمێنێتەوە.

لەنێویاندا مەعەرەت نوعمان و کەفرومە هەیە، کە رایانگەیاندووە هێزی پۆلیسیان هێشتا چالاکە و راستەوخۆ سەر بە ئەنجومەنی خۆجێییە و دەستێوەردانی دەرەکی رەتدەکەنەوە لە کارەکانی ئەنجومەن و هێزی پۆلیسدا.

عەساف وتی دانیشتوانی مەعەرەت نوعمان بەیاننامەیەکیان بڵاوکردەوە تیایدا کردنەوەی هەر بازگەیەکی تەحریر شامیان رەتکردەوە و حکومەتی بەناو رزگارییشیان رەتکردەوە، "چونکە نوێنەری رەوای خەڵکی سوریا نیە".

پێشێلکاری دژی مەدەنییەکان بەردەوامە

عەساف وتی هاوکات تەحریر شام ماوەیەکە بەردەوامە لە پێشێلکارییەکانی دژی مەدەنیەکان بە دروستکردنی لیستێك لە رکابەرەکانی و بەدواکەوتنی ئەو کەسانە.

وتی ئەو هاوپەیمانێتیە توندڕەوە ماوەیەکە هەڵدەکوتێتە سەر ماڵی خەڵك بەدوای کەسە داواکراوەکاندا و دەستی بەسەر دەیان ماڵدا گرتووە لەژێر پاساوی ئەوەی خاوەنەکانیان سەر بەو گروپانه‌ن كه‌ دژی هاوپەیمانێتیەکەن.

عەساف وتی ئەم ماڵانە دەخرێنە ژێردەستی تەحریر شامەوە و بەکاردەهێنرێن بۆ نیشتەجێکردنی ئەندامەکانی.

وتیشی ئەندامانی تەحریر شام هەڵدەکوتنه‌ سەر دادگاکان و دەزگاکانی پۆلیس، دەست بەسەر شمەك و پارەکانیاندا دەگرن و ئەمەیان لە شارۆچکەکانی ئەریحا، غەدفە، جەرجناز و کەفرمە کردووە.

هه‌روه‌ها وتی ئەو هاوپەیمانێتیە توندڕەوە دەستیشی گرتووە بەسەر گەنجینەکانی ئارد و پارەی ئەو لایەنانەدا کە بەڕێوەیان دەبرد.

عەساف وتی هەرچەندە شەڕ وەستاوە و رکابەرانی تەحریر شام کشاونەتەوەچالاکوانان بەردەوامن لە رەتکردنەوەی فراوانخوازییەکەی.

وتیشی دەورییەکانی تەحریر شام رووبەڕووی خۆپیشاندەران بوونەتەوە کە بوونی لە ناوچەکە رەتدەکەنەوە، وەك بەمدواییانە لە کەفرومە روویدا.

له‌ڕێگای تویته‌ره‌وه‌ په‌یوه‌ندی بكه‌ لەڕێگەی فەیسبووکەوە پەیوەندی بکە
ئەم بابەتەت بەدڵە؟
5
5

0 كۆمێنت

رێوشوێنەکانی کۆمێنت نوسین Captcha