پۆلیسی عێراق بە دیارونای وت ئۆپەراسیۆنی ئەمنی "ئازایانە"یان ئەنجامداوە دژی پاشماوەکانی رێکخراوی "دەوڵەتی ئیسلامی لە عێراق و سوریا" (داعش) لە پارێزگای دیالە.
بەڕێوبەری پۆلیسی دیالە، لیوا فەیسەڵ عەبادی، سێشەممە (25 کانونی یەکەم) وتی پۆلیسی دیالە "توانیوێتی هەستی دڵنیایی بداتە خەڵك" لە هەموو شارەکانی پارێزگاکە.
بە دیارونای وت: "بەردەوام ئۆپەراسیۆنی نایاب و ئازایانە ئەنجامدەدەین دژی پاشماوەکانی داعش تا رێگربین لەوەی شوێنی سەلامەتییان دەستبکەوێت لە ناوچە دوورەدەستەکان."
عەبادی وتی ئۆپەراسیۆنەکانی پۆلیس لە نیوەی دووەمی 2018 سەریانکێشا بۆ "دۆزینەوە و سوتاندنی نزیکەی 50 لە حەشارگەکانی گروپەکە لە گرد و دۆڵەکانی حەمرین و لە ناوچەکانی هاوسێی پارێزگای سەلاحەدین".
وتی بەگشتی، نزیکەی 900 کەس لەو ماوەیەدا دەستگیرکران، کە "داواکرابوون بۆ دادگایی لە کەیسی تیرۆریزم و هێرشی تاوانکارانەدا".
عەبادی وتی: "لانیکەم 35 تیرۆریست، لەنێویاندا سەرکردەی مەترسیدار، كوژران لەکاتی ئۆپەراسیۆنی ئەمنی و هێرشی لەناکاودا بۆ سەر پێگە نهێنیەکانی دوژمن."
دۆخی ئەمنی باشترکراو
وتی دۆخی گشتی لە پارێزگاکە "پارێزراو و سەقامگیرتر بووە".
وتیشی: "ئەو سەقامگیرییە وایکردووە شەقام و رێگەکان بکەینەوە لە ناوەندی پارێزگای دیالە کە بۆ ماوەی زیاد لە دەیەیەك بەهۆکاری ئەمنی داخرابوون."
ههروهها وتی: "بهربهستی چیمەنتۆمان لاداوە لە 10 رێگەی سەرەکی و لاوەکی [لە بەعقوبە] و بە فەرمی بۆ پیادەڕهوان و ئۆتۆمبیل کراونەتەوە. خەریکە ئەم ئەرکە تەواودەکەین و دواتر تەواوی شارەکانی دیکەش دەگرێتەوە."
عەبادی وتی هەنگاو نراوە بۆ پاراستنی رێگە بازرگانییەکان کە بە پارێزگاکەدا دەڕۆن، كه بەرچاوترینیان رێگەی کەرکوك-بەغدایە.
وتی کامێرای گەرمیبین، بازگەی هاوبەش و شوێنی چاودێری دامەزرێنراون، لەکاتێکدا دەوریەکانی پۆلیس لە هەموو ناوچەکان دەگەڕێن.
وتیشی: "لە شەش مانگی رابردوودا هیچ رووداوێکی رووبەڕووبوونەوەمان تۆمارنەکردووە، کە رەنگدانەوەی سەرکەوتنی هەنگاوە بەرپێگرەکانمانە."