سوپای ئەمریکا و لیوای زەفرای ئیماراتی عەرەبی دووشەممە (17 کانونی یەکەم) دەستیانکرد بە مانۆڕێکی هاوبەشی سێ رۆژە لە ناوچەی حەمرای ئیمارات بۆ بەهێزکردنی ئامادەیی جەنگی و باشترکردنی توانای وەڵامدانەوەی هەڕەشە ئەمنیەکان.

پسپۆڕان بە مەشاریقیان وت ماوه‌ی خایاندنی "یەکێتی ئاسنینی 9" بەردەوامدەبێت تا 19 کانونی یەکەم، كه‌ زۆر گرنگە بەهۆی پێشهاتەکانی خۆرهەڵاتی ناوەڕاسته‌وه‌ بەگشتی و کەنداو بەتایبەتی.

عەقید راشد محەمەد مەری کە پێشتر لە بەڕێوبەرێتی پۆلیسی دژی مادده‌ هۆشبەره‌كان له‌ دوبەی بووە، وتی: "مانۆڕی هاوبەشی سەربازیی یەکێتی ئاسنینی 9 درێژکراوەی زنجیرە مانۆڕی سەربازیی هاوبەشی 'چنگی ئاسنین'ە."

بە مەشاریقی وت لەم ساڵانەی دواییدا راهێنانی هاوبەش ئەنجامدراون بەئامانجی بەهێزکردنی توانای سەربازیی و جەنگی و لۆجستیی هەردوولا.

وتی راهێنانەکان بەشدارییەکیشن بەرەو بەهێزکردنی هەماهەنگی و پشتگیریی کاری سەربازیی هاوبەش لە دۆخی کتوپڕدا.

مەری وتی: "راهێنانەکان وەك بەشێك لە رێککەوتنە سەربازییەکانی نێوان ئەو دوو لایەنە ئەنجامدەدرێن، کە تەرکیزیان لەسەر چەکدارکردن و راهێنان و بەهێزکردنی توانای جەنگییە."

وتیشی راهێنانەکانی یەکێتی ئاسنینی 9 "گرنگن بۆ لیوای زەفرا بەهۆی ئەوەی بە تەقەمەنی راستەقینە ئەنجامدەدرێن"، کە مانای وایە هاوشێوەی دۆخی راستەقینەی شه‌ڕه‌ و بۆ بەهێزکردنی توانای لیواکەیە.

ئاستێکی باڵای ئامادەیی

وتی زەفرا یەکێکە لە گرنگترین یەکە سەربازییەکانی ئیمارات و ئەرك و کردەی وای پێسپێردراوە "کە پێویستی بە باڵاترین ئاستی ئامادەیی هەیە تا بتوانێت بەخێرایی وەڵامی هەر دۆخێکی کتوپڕی ئەمنی و سەربازی بداتەوە".

مەری وتی ئەو ئەرکانەی بە لیواکە سپێردراوە، کە لە بنکەی زەفرایە، پاراستنی سنوورە ئاوی و زەمینیەکانی وڵاتەکەیە.

وتیشی بۆ ئەو مەبەستە، راهێنانه‌كه‌ی ئێستا یارمەتی هەماهەنگی بێکێشەی پشتیوانی ئاسمانی و تۆپخانەكانه‌ بۆ لیواکە لەکاتی ئه‌ركی شه‌ڕدا.

هه‌روه‌ها وتی: "ئیمارات بەرپرسیارێتی سەربازیی مەزنی لەسەرشانە پەیوەست بە ئاسایشی دەریایی لە ناوچەی کەنداو و چاودێریکردنی کەناراوەکان و ئاوەکانی ناوچەکە."

پرۆفیسۆری کۆلێژی یاسا لە زانکۆی عەجمان، خالید زوعبی بە مەشاریقی وت: "لەو ئەرکانەی سپێردراوە بە هێزە سەربازییەکان لە ناوچەی کەنداو رووبەڕووبوونەوە و رێگرتن لە چەتەگەری ده‌ریایی و قاچاخچێتییان تێدایە."

روونیشیکردەوە كه‌ چەتەگەری ده‌ریایی و قاچاخچێتی سەرچاوەی سەرەکی داهاتن بۆ باندە چەکدارەکان و گروپە تیرۆریستیەکان و وتیشی راهێنانی سەربازی یارمەتی بەهێزکردنی ئاستی ئامادەیی جەنگی دەدات بۆ تێکشکاندنی چالاکی لەوشێوەیە.

ئامادەیی بۆ ئەگەری هەڕەشە

نوێنەری پێشتری سەربازیی سعودیە، لیوا مەنسور شەهری وتی: "راهێنانی هاوبەشی هێزەکانی ئەمریکا و ئیمارات لەکاتێکی گرنگدایە چونکە ناوچەی کەنداو بە قۆناغێکی زۆر هەستیاردا تێپەڕدەبێت لەڕووی ئەمنیەوە."

ئاماژەیکرد بە توندبوونی گوتارەکانی ئێرانیش دوای سەپاندنەوەی سزاکانی ئەمریکا بەسەریدا.

شەهری بە مەشاریقی وت ئەمە پێویستی بە وریایی هه‌یه‌ و پێشبینیکردنی هەوڵی ئێران بۆ شکاندنی گەمارۆکان و لابردنی سەرنج لەسەریان.

وتی ئەو راهێنانە هاوبەشە وادەکات هێزە بەشدارەکان بتوانن "خۆیان ئاشنابکەن بە شێواز و تاکتیکە باوەکانی پێویست بۆ هەر دۆخێکی کتوپڕ".

شەهری وتی دەرفەتێك دەڕەخسێنن بۆ ئیمارات فێربێت دەربارەی دوایین تاکتیکە سەربازییەکانی ئەمریکا و شێواز و تەکنیکەکانی پلاندان بۆ بەهێزکردنی توانای جەنگی و زیادکردنی ئەزمونیان.

وتی ئەمەش "کاریگەریی ئەرێنی دەبێت بۆ سەر ئەداو کردەی سەربازیی راستەقینەیان".

وتیشی راهێنانەکە بە تەقەمەنی راستەقینە ئەنجامدراوە و دەبێتە هۆی "زیادکردنی واقیعی بوون و جددیەتی راهێنانەکە".

هه‌روه‌ها وتی ئەمە زۆر گرنگە بۆ سەربازەکان، "بەتایبەتی سەربازانی نوێ، کە ئەزمونی راستەقینەی شه‌ڕیان نیە".