هه‌واڵه‌كانی عێراق
ئاساییش

لە هەڵمەتێکی ئەمنیدا لە خانەقین 3 حەشارگەی داعش دەدۆزرێنەوە

خالید تائی

هێزە ئەمنیەکانی عێراق لە شاری خانەقینی پارێزگای دیالە جێگیردەبن لەکاتی هەڵمەتێکدا دژی پاشماوەکانی رێکخراوی "دەوڵەتی ئیسلامی لە عێراق و شام" (داعش) لە ئازاری 2018. [خاوەنی وێنە: فەرماندەیی پۆلیسی دیالە]

هێزە ئەمنیەکانی عێراق لە شاری خانەقینی پارێزگای دیالە جێگیردەبن لەکاتی هەڵمەتێکدا دژی پاشماوەکانی رێکخراوی "دەوڵەتی ئیسلامی لە عێراق و شام" (داعش) لە ئازاری 2018. [خاوەنی وێنە: فەرماندەیی پۆلیسی دیالە]

هێزەکانی عێراق بەپشتیوانی ئاسمانی شوێنپێی شانەکانی رێکخراوی "دەوڵەتی ئیسلامی لە عێراق و شام" (داعش) هەڵدەگرن لە ناوچە دوورەدەستەکانی باکوری خۆرهەڵاتی پارێزگای دیالە وەك بەشێك لە ئۆپەراسیۆنێکی به‌رفراوان کە دووشەممە (6 ئاب) دەستیپێکرد.

بەگوێرەی کاربەدەستێکی ناوچەکە، هێزە هاوبەشەکان لە فەرماندەیی ئۆپەراسیۆنەکانی دیالە، یەکەکانی سوپا و پۆلیسی خۆجێی بەپشتگیریی ئاسمانی لە فڕۆکە جەنگیەکانی عێراقەوە، ئۆپەراسیۆنەکەیان بەدرێژایی دوو رێگە دەستپێکرد.

یەکەمیان لە باکوری شاری خانەقینەوە درێژدەبێتەوە بەرەو باکوری جەلەولا و دووەمیان ناوچەکانی باکوری میقدادیە رووماڵدەکات.

ئەم دوو رێگەیە چەندین گوند و باخی کشتوکاڵیی چڕیان لەسەرە، لەگەڵ ناوچەیەکی ئاڵۆز کە دۆڵ و ئەشکەوتی تێدایە.

ئەم هەڵمەتە نوێیە بەشێکە لە زنجیرەی چەند هەڵمەتێکی ئەمنی بۆ بنەبڕدنی ئەو توندڕەوانەی کە ناوچە دوورەدەستەکانی دیالە، بەتایبەتی لە گردەکانی حەمرین، بەکاردەهێنن بۆ خۆشاردنەوە لە هێزە ئەمنیەکان و ئەنجامدانی هێرش لە تاریکیدا.

قائیمقامی قەزای خانەقین، محەمەد مەلا حەسەن، سێشەممە (7 ئاب) بە دیارونای وت تائێستا لەم ئۆپەراسیۆنەدا سێ "حەشارگە"ی داعش تێکشکێنراون کە چەردەیەك چەك و ئامراز و شمەكیان تێدابوو.

وتی پاشماوەکانی داعش لە دەوروبەری خانەقین جێگیربوون و هەوڵدەدەن جارناجارێك هێرشبکەن.

وتی بەڵام هێزە ئەمنیەکان ئامادەن بۆیان و بەردەوام دەیانکەنە ئامانج.

وتیشی بەمدواییانە ژمارەیەك هاوڵاتی بڕیاری جێهێشتنی گوندی مەردانیان داوە لە دەوروبەری خانەقین بەرەو ناوەندی شار لە ترسی هەڕەشەی تیرۆریزم، بەڵام ئەم ژمارەیە "سنووردارە" و "هێندە زۆر نیە کە راپۆرتە رۆژنامەوانیەکان باسی دەکەن".

هه‌روه‌ها وتی: "دۆخەکە سەقامگیرە و پاشماوەکانی تیرۆریزم هێشتا ناتوانن کاریگەریی جدییان هەبێت."

وتیشی: "شارەکە، پێش دەرکەوتنی داعش و لەکاتی فراوانخوازیی گروپەکەدا لە شارە هاوسێکانی خانەقین، وەك جەلەولا و سەعدیە و حەمرین، شوێنی لەخۆگرتنی نزیکەی 120,000 ئاوارە بوو لەنێو خودی پارێزگای دیالەوە."

بەگوێرەی مەلا حەسەن، دوای دەستپێکی ئۆپەراسیۆنی ئازادکردن، ژمارەی ئاوارەکان کەمبووه‌وە بۆ کەمتر لە 40,000، كه‌ ئاماژەیەكه‌ بە باشتربوونی ئەمنیەتی دیالە و تەواوی عێراق.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500