ئابوری |

2018-08-03

عێراق پێشانگایه‌كی گەورەی وەبەرهێنان ئەنجامدەدات لە کانونی یەکەم

Di icons tw 35 Di icons fb 35

تەکنیکارانی عێراق سەرپەرشتی بنیاتنانەوەی بەنداوی ره‌مادی دەکەن لە ئەنبار کە لە شەڕی دژبە رێکخراوی 'دەوڵەتی ئیسلامی' (داعش)دا زیانی بەرکەوتووە. [خاوەندارێتی وێنە: سندوقی بنیاتنانەوەی ناوچە زیانلێکەوتووەکان بەهۆی ئۆپەراسیۆنی تیرۆریستییەوە].
تەکنیکارانی عێراق سەرپەرشتی بنیاتنانەوەی بەنداوی ره‌مادی دەکەن لە ئەنبار کە لە شەڕی دژبە رێکخراوی 'دەوڵەتی ئیسلامی' (داعش)دا زیانی بەرکەوتووە. [خاوەندارێتی وێنە: سندوقی بنیاتنانەوەی ناوچە زیانلێکەوتووەکان بەهۆی ئۆپەراسیۆنی تیرۆریستییەوە].

ئامادەکاریەکان بەردەوامن بۆ بەستنی پێشانگایه‌کی وەبەرهێنان لە عێراق کە ژمارەیەکی زۆر کۆمپانیای وەبەرهێنەری عێراقی و بیانی کۆدەکاتەوە بۆ تاوتوێکردنی شێوازه‌كانی زاڵبوون بەسەر بەربەستەکانی وەبەرهێنان لە وڵاتەکەدا، بەرپرسانی عێراق هەینی (3 ئاب) بە دیارونای وت.

مستەفا هیتی کە سەرپەرشتی سندوقی بنیاتنانەوەی ناوچە زیانلێکەوتووەکان بەهۆی ئۆپەراسیۆنی تیرۆریستییەوە دەکات وتی پێشانگاکە کە بۆ 5 و 6 کانونی یەکەم دانراوە تایبەت دەبێت بە بنیاتنانەوەی ئەو پارێزگایانەی لەدەست رێکخراوی "دەوڵەتی ئیسلامی" (داعش) ئازادکراون.

وتیشی پێشانگاکە کە بەناونیشانی "هەنگاویك بۆ پێشەوە" دەبێت و لە هۆتێل بابیلۆن لە بەغدا ئەنجامدەدرێت، "کۆنفرانسێکی وەبەرهێنانی تەقلیدی" نابێت.

هیتی بە دیارونای وت: "ئێمە دەمانەوێت ژمارەیەك کۆمپانیای وەبەرهێنەری عێراقی و بیانی کۆبکەینەوە لەگەڵ دامودەزگا نیشتیمانیەکان و نوێنەرانی پارێزگا ئازادکراوەکان."

وتیشی: "ئێمە تەنیا داوا لەو کۆمپانیایانە ناکەین خۆیان و تواناکانیان پیشانبدەن و سەیری ئەو پڕۆژانە بکەن کە بۆ وەبەرهێنان ئامادەن وەك ئەوەی لە کۆنفرانسەکانی پێشوودا کراوە، بەڵکو گوێشیان لێدەگرین."

هیتی وتی: "ئێمە دەمانەوێت ئەو کۆمپانیایانە دیدی خۆیان سەبارەت بە کۆسپەکانی سەرڕێی فراوانبوونی دەرفەتی وەبەرهێنان بخەنەڕوو [لە عێراقدا] هه‌روه‌ها ده‌رباره‌ی ئاسته‌نگه‌كانی تری بازاڕی عێراق."

وتیشی ئامانجی سەرەکی ئەو پێشانگای وەبەرهێنانە بۆ گەیشتن بە چەند بڕیارێك کە ببێتە هۆی هەموارکردنەوەی چەند رێکار و یاسایەك کە کۆمپانیاکان وەك بەربەست ده‌یبینن له‌به‌رده‌م کارەکانیاندا.

هەروەها وتی: "ئێمە هەوڵدەدەین بەربەستەکان دیاریبکەین یان وەك ئێمه‌ پێی دەڵێین بۆشاییەکانی پەیوەست بە جێبەجێکردنی یاسای وەبەرهێنانی عێراق و باسکردنیان لەڕێی چاکسازی کاریگەرەوە."

وەبەرهێنان 'گرنگە' بۆ بوژانەوەی ئابوری

هیتی وتی وەبەرهێنان گرنگە بۆ بوژانەوەی ئەو شارانەی لەلایەن داعشەوە تێكدراون و بەدەستهێنانی بەرەوپێشچوونی بەرچاو.

وتیشی: "ئێمە پێویستە خەڵکی پارەدار هانبدەین بۆئەوەی بەهێزەوە بێنەناو ئابوریمانه‌وه‌ و وەبەرهێنان بكه‌ن لە پرۆژە و کۆمپانیا نیشتمانیانه‌دا كه‌ توشی ئفلیجی بوون." ئاماژەشی دا بەوەی ئەوە بارگرانییەکی زۆرە لەسەر دەوڵەت.

هەروەها وتی: "ئەو پرۆژە و کۆمپانیایانە یان لە بەرهەمهێنان وەستاون یان پارەیەکی زۆر لە خەزێنەی عێراق دەبەن کە دەتوانرێت بۆ هەڵمەتی ئاوەدانکردنەوە ئاراستەبکرێت."

هیتی وتی وەبەرهێنان کاریش بۆ ژمارەیەکی زۆری خەڵکی دانەمەزراو دابیندەکات.

وتیشی شەش ملیۆن کەس موچەخۆری حکومەتن و ئەمەش گوشار دەخاتەسەر خەزێنەی گشتی.

هەروەها وتی: "گرنگە رۆڵی کەرتی تایبەت بەهێزبکرێت له‌كاتێكدا عێراق بەرەو ئابوریی بازاڕی ئازاد هەنگاویناوە."

هیتی وتی نزیکەی 400 پرۆژە هەیە -- کە زۆربەیان لە دوو ساڵی رابردوودا تەواوبوون، لەکاتێکدا ئەوانی تر لەژێر کارکردندان یان لە قۆناغی پلانداناندان -- لە پارێزگاکان و ئەو ناوچانەی لەلایەن تیرۆریزمەوە زیانیان بەرکەوتووە.

لەنێو ئەمانەدا پارێزگاکانی نەینەوا، ئەنبار، سەڵاحەدین، کەرکوك، دیالە و ناوچەکانی پشتێنەی بەغدا و باکوری پارێزگای بابل هەن.

وتیشی: "ئەو پرۆژانە لە سێکتەره‌ جیاوازه‌كاندان کە توشی تێکشکان هاتوون بەهۆی کردەی تیرۆریزم و چالاکی سەربازییەوە، بەتایبەتی سێکتەرەکانی وزە و شارەوانی و تەندروستی و پەروەردە."

هەروەها وتی ئەو پرۆژانە لەلایەن سندوقی بنیاتنانەوەی حکومەت و له‌ڕێی قەرز و کۆمەکی رێکخراوان و وڵاتانی به‌خشه‌ره‌وه‌ پاره‌یان بۆ دابینکرا کە گەورەترینیان قەرزە 750 ملیۆن دۆلاریەکەی بانکی جیهانی بوو.

بەگوێرەی هیتی بانکی گەشەپێدانی ئەڵمانیا قەرزێکی 500 ملیۆن یۆرۆیی (580 ملیۆن دۆلار)ی پێشکەشکردووە و کوێتیش بڕی 100 ملیۆن دۆلاری ته‌نخانكردووه‌.

ئەم بابەتەت بەدڵە؟

5 Di icons no

0 كۆمێنت

* واتە ئەم خانەیە پێویستە
Captcha