http://diyaruna.com/ckb/articles/cnmi_di/features/2018/07/17/feature-02

ئاساییش |

2018-07-17

رژێمی سوریا گردێکی ستراتیژی دەگرێتەوە لە دەرعا

Di icons tw 35 Di icons fb 35

ئەفسەرێکی سوپای سوریا لە مەیدانی سەرەکیی شارۆچکەی حارەی پارێزگای دەرعا وەستاوە دوای ئەوەی هێزەکانی رژێم چوونە ناوی و دەستیانگرت بەسەر ئه‌و گردە ستراتیژیەدا. [خاوەنی وێنە: موسعەب عەساف]
ئەفسەرێکی سوپای سوریا لە مەیدانی سەرەکیی شارۆچکەی حارەی پارێزگای دەرعا وەستاوە دوای ئەوەی هێزەکانی رژێم چوونە ناوی و دەستیانگرت بەسەر ئه‌و گردە ستراتیژیەدا. [خاوەنی وێنە: موسعەب عەساف]

رژێمی سوریا گرتنەوەی ناوچەکانی دەرەوەی کۆنترۆڵی خۆی لە دەرعا تەواوکرد و هێزەکانی چوونەتە ناو شارۆچکەی حارە لە بەشی باکوری پارێزگاکە و ده‌ستیانگرت به‌سه‌رگردەکەی نزیكیدا، سەرچاوەیەکی ناوخۆ وتی.

ئەفسەری سوپای سوریای ئازاد یاسر تورکمانی بە دیارونای وت ئەمە دوای تۆپباران و بۆمبارانی چڕی چەند رۆژی رابردوو هات، بەجۆرێك هێزەکانی سوپای سوریا چوونە ناو شارەکەوه‌ دەستبەجێ دوای ئەوەی تۆپباران راوەستا.

توركمانی وتی تۆپبارانی چەند رۆژی حارە لە باکوری دەرعا و گردە ستراتیژییەکەی، چەکدارانی ئۆپۆزسیۆنی سوریای ناچارکرد لێی بکشێنەوە و رێیخۆشکرد بۆ چوونەناوەوەی رژێمی سوریا.

وتیشی: "هێرشە ئاسمانیەکان چڕوپڕ بوون و چاوەڕواندەکرێت ئاستی قوربانیانی نێو ریزەکانی ئۆپۆزسیۆن بەرزبێت."

تورکمانی وتی دووبەرەکی کەوتە نێوان ریزەکانی ئۆپۆزسیۆنه‌وه‌، لەنێوان ئەوانەدا كه‌ پشتگیریده‌كه‌ن له‌ ئاشتەوایی لەگەڵ رژێم و ئەوانەی دژایەتی ده‌كه‌ن، کە بووە هۆی دەستپێکردنەوەی تۆپباران و بۆردومان.

وتیشی ئەوانەی دژایەتی ئاشتەواییان دەکرد لە هەندێك لە گەڕەکەکانی حارە بوونیان هەبوو، لەگەڵ گردی حارە و جەدیرە کە شارۆچکەیەکی بچوکە له‌لای خۆرهەڵاته‌وه‌.

زیاد لە 200 هێرشی ئاسمانی و 100 موشکی زەمین-بە-زەمین و سەدان گوللەتۆپی مامناوەند ژمێردران لەماوەی ئەو 24 كاتژمێره‌ی پێش هاتنەناوەوەی رژێمدا بۆ ناوچەکە.

چارەنوسی ئۆپۆزسیۆن نادیارە

تورکمانی وتی کۆنترۆڵی گردی حارە گرنگییەکی بەرچاوی هەیە چونکە یەکێكە لە بەرزترین خاڵەکانی ناوچەکە و وادەکات ئەو لایەنەی دەستی بەسەردا گرتووە کۆنترۆڵی ناوچەکانی دەوروبەری بکات.

وتیشی بە چوونەناو حارە و گرتنی گردەکە و گوندەکانی سیملین و زیمرین و خیربیت مەلیحە، ئێستا رژێمی سوریا کۆنترۆڵی نزیکەی تەواوی ناوچەی دەرعای کردووە، جگە لە ناوچەیەکی بچوکی کۆنترۆڵکراو لەلایەن جەیشی خالید بن وەلیدی سەر بە رێکخراوی "دەوڵەتی ئیسلامی لە عێراق و شام" (داعش)ه‌وه‌.

تورکمانی وتی: "چارەنوسی چەکدارانی ئۆپۆزسیۆنی دژی ئاشتەوایی هێشتا دیارنیە چونکە پەیوەندی له‌گه‌ڵیان پچڕاوە، لەکاتێکدا زۆربەی ئەوانەی ئاشتەواییان قبوڵکرد نایانەوێت بڕۆن بەرەو پارێزگای ئیدلیب."

ئاماژەی بەوەش کرد كه‌ ئەوانەی دژایەتی ئاشتەوایی ناکەن رازیبوون بەو هەنگاوە ئەمنیانەی کە رێکخراون لەنێوان خۆیان و رژێمدا.

وتی: "ئەگەری ئەوە هەیە ئەم چەکدارانە پەیوەندیبکەن بە ریزەکانی فەیلەقی 5ی تازەپێکهێنراوی فەوجی سوپای سوریاوه‌ کە دامەزرێنراوە بۆ لەخۆگرتنی ئەو ئەندامانەی گروپەکانی ئۆپۆزسیۆن کە ئاشتەوایی لەگەڵ رژێم په‌سه‌نددەکەن."

دەوترێت کە رژێم ئەم فەوجە بەکاردەهێنێت بۆ شەڕکردن دژی پاشماوەکانی داعش و جەیشی خالد بن وەلید لە ناوچەکە.

رژێم دەچێتە ناو قونەیترەوە

روانگەی سوری بۆ چاودێری مافەکانی مرۆڤ رایگەیاند كه‌ هێرشە ئاسمانیەکانی سێشەممە (17 تەمموز) حەوت مەدەنی کوشت لە پارێزگای قونەیترەی هاوسێ.

لە یەکشەممەوە رژێم تۆپبارانی قونەیترە دەکات بۆ گرتنەوەی، دوای گرتنەوەی زۆرینەی دەرعا لەماوەی کەمتر لە مانگێکدا.

روانگەکە رایگەیاند كه‌ "شەش مەدەنی، لەنێویاندا دوو ژن و سێ منداڵ، لە هێرشە ئاسمانیەکانی نزیك عەین تینا کوژران" لەسەر سنوری قونەیترە و دەرعا.

روانگەکە رایگەیاند كه‌ دەستبەجێ روون نەبوو ئایا هێرشەکان لەلایەن رژێمەوە ئەنجامدراون یاخود هاوپەیمانەکەی، روسیا.

راشیگەیاند كه‌ لە خۆرئاوای پارێزگای دەرعای ته‌نیشتی، هێرشە ئاسمانیەکانی روسیا مەدەنیەکیان کوشت له‌ نزیك گوندی عالیە.

بەڕێوبەری روانگەکە رامی عەبدولڕەحمان وتی: "لە بەیانی سێشەممەوە، هێرشه‌ ئاسمانییه‌ چڕوپڕه‌كانی روسیا و ئه‌و به‌رمیله‌ بۆمبانه‌ی بەردرانه‌وە لەلایەن رژێمەوە، ناوچەیه‌كیان له‌نێوان قونەیترە و دەرعا کردۆتە ئامانج."

وتیشی تەحریر شام لەو ناوچەیە هەیە.

ئەو هاوپەیمانێتیە توندڕەوە لەنێو ئەو رێککەوتنەدا نیە کە لەلایەن رژێم و چەکدارانی ئۆپۆزسیۆنەوە کرا لە دەرعا لە سەرەتای ئەم مانگەدا.

عەبدولڕەحمان وتی دووشەممە لە قونەیترە، چەکدارانی ئۆپۆزسیۆن لە لانیکەم پێنج شارۆچکە ئاڵای نیشتیمانییان هەڵکرد، بە مەبەستی رێککەوتنێکی هاوشێوە لەگەڵ رژێم.

وتیشی: "لایەنەکانی ئۆپۆزسیۆن لەم شارۆچکانە شەڕیان وەستاندووە بۆ رێگرتن لە بۆمباران و کاولکاری."

روانگەکە رایگەیاند كه‌ لە دوو رۆژی دوای یەکشەممەوە، لانیکەم 43 سەربازی رژێم لە دەرعا و قونەیترە کوژراون، لەکاتێكدا 48 توندڕەو و چەکداری ئۆپۆزسیۆن کوژراون.

ئەم بابەتەت بەدڵە؟

0 Di icons no

0 كۆمێنت

* واتە ئەم خانەیە پێویستە
Captcha