ئاساییش |
2018-04-13

هەوڵەکانی پاکردنەوەی مین لە موسڵ بەرەو پێشدەچن


چەند پۆلیسێکی عێراقی پێکەوە بۆمبێكی دەستکرد پوچەڵدەکەنەوە کە لەلایەن "دەوڵەتی ئیسلامی" (داعش) دانرابوو لە گەیارە لە باشوری موسڵ. [خاوەنی وێنە: فەرماندەیی پۆلیسی نەینەوا]
چەند پۆلیسێکی عێراقی پێکەوە بۆمبێكی دەستکرد پوچەڵدەکەنەوە کە لەلایەن "دەوڵەتی ئیسلامی" (داعش) دانرابوو لە گەیارە لە باشوری موسڵ. [خاوەنی وێنە: فەرماندەیی پۆلیسی نەینەوا]

حکومەتی عێراقی نزیکەی 30,000 مین و تەقەمەنی دەستکردی لابردووە کە "دەوڵەتی ئیسلامی" (داعش) دوای خۆی بەجێیهێشتوون لە موسڵ و هەوڵەکانیش بۆ پاکردنەوەی شارەکە بەردەوامن.

بەرپرسانی عێراقی دەڵێن هەوڵەکانی حکومەت وایانکردووە زۆربەی زۆری مەترسیەکان، هه‌رچه‌نده‌ هەمووی نا، لەسەر دانیشتوانەکە نەهێڵێت، چونکە ناوچەی زۆر گەورە لە رۆژئاوای شارەکە هەیە هێشتا تەقەمەنی زۆری تیادا ماوە.

سەرەتا داعش مینەکای دانا بۆ ئەوەی رێگریبکات لە هێزەکانی عێراق لە چوونە ئەو ناوچانەی کۆنترۆڵیدەکردن و دواتریش کە لەو ناوچانە کشایەوە مینی دانا بۆ ئەوەی گورز بوەشێنێت لە هێزە رزگارکەرەکان و رێگربێت لە گەڕانەوەی دانیشتوانەکە.


منداڵان لە قوتابخانەیەکی سەرەتایی لە رۆژهەڵاتی موسڵ چەند وێنەیەکیان بەدەستەوەیە کە هۆشدارییان دەداتێ لەسەر مەترسی و دەستلێنەدانی ئه‌و تەقەمەنیە دەستکردانه‌ی "دەوڵەتی ئیسلامی" (داعش) بەجێیهێشتوون. [خاوەنی وێنە: بەڕێوبەرایەتی کاروباری مین]

منداڵان لە قوتابخانەیەکی سەرەتایی لە رۆژهەڵاتی موسڵ چەند وێنەیەکیان بەدەستەوەیە کە هۆشدارییان دەداتێ لەسەر مەترسی و دەستلێنەدانی ئه‌و تەقەمەنیە دەستکردانه‌ی "دەوڵەتی ئیسلامی" (داعش) بەجێیهێشتوون. [خاوەنی وێنە: بەڕێوبەرایەتی کاروباری مین]

'لە هەموو شوێنێك تەقەمەنییان دانا'

ئەندامی ئەنجومەنی پارێزگای نەینەوا خەڵەف حەدیدی بە دیارونای وت ژمارەی ئەو مینانەی داعش دایناون لە موسڵ "مه‌زه‌نه‌ ناكرێت".

وتی: "تەقەمەنییان لە هەموو شوێنێك داناوە، لە عەمودی کارەباوە بگرە تا تاقمی قەنەفەی ماڵان و تەنانەت لەناو یاریی منداڵانیشدا."

وتی: "حکومەت هەموو توانای خۆی بەکاردەهێنێت بۆ نەهێشتنی ئەو مەترسیە." ئاماژەشی بۆ ئەوە کرد کە قوربانی كه‌وتۆته‌وه‌ له‌نێوان هه‌ردووك تیمەکانی هەڵگرتنەوەی مین و دانیشتوانەکەشدا کە گەڕاونەتەوە.

وتی کێشەکە پێویستی بەوه‌ هەیە توندتر مامەڵەی لەگەڵدا بکرێت بە "کۆکردنەوەی هەموو تواناکان و راگەیاندنی هه‌ڵمه‌تێكی سەرتاسەریی گەورەی پاکردنەوە" بەهاوکاری عێراق و هاوپەیمانییە نێودەوڵەتیەکانی.

وتی ئەو هەوڵەش پێویستی بە ئامێری پێشکەوتوو هه‌یه‌ بۆ دۆزینەوە و پوچەڵکردنەوەی تەقەمەنیەکان لەگەڵ راهێنان بۆ ئەوەی تیمی زیاتری هەڵگرتنەوەی مین بۆ ئەو ناوچانە دابنرێن.

تیمەکان به‌خێرایی له‌كاردان

موعەمەر سەڵاحەدین، سەرۆکی بەشی باکوری بەڕێوبەرێتی چالاکی مینی سەر بە وەزارەتی تەندروستی و ژینگە، وتی لابردنی تەقەمەنیە دەستکردەکان زۆر خێرا بەڕێوەدەچێت.

سەڵاحەدین بە دیارونای وت: "لە ئاستێکی بەرزدا کاردەکەین و هاوئاهەنگیش دەکەین لەگەڵ یەکەی پۆلیسی نەهێشتنی تەقەمەنیەکان و یەکەی ئەندازیاریی سەربازی و دەزگای چالاکی مینی نەتەوە یەکگرتوەکان و چەندین رێکخراوی دیکەی ناوخۆیی و جیهانیش."

وتی هەوڵە هاوبەشەکان تا ئێستا لابردنی 27,000 مین و تەقەمەنی دەستکردی لە هەموو ناوچەکانی موسڵ بەخۆوە بینیووە "بەڵام ناوچەیەکی گەورە لە پارێزگای نەینەوا [نزیکەی 115 کیلۆمەتر دووجا] ماوە تا پاکبکرێتەوە".

وتیشی: "زۆر سەختە بزانیت ژمارەی ئەو تەقەمەنیە دەستکرد و مینانەی ماون چەنده‌، چونکە زۆربەیان لەژێر خۆڵ و خاشاکی بیناکاندان، بەتایبەتی لە رۆژئاوای موسڵ."

هه‌روه‌ها وتی تیمەکان رۆژانە چەندین جۆر تەقەمەنی دەدۆزنەوە و هەندێکیان تاڕادەیەك ساده‌ن و هەشیانە زۆر پیشەییانە درووستکراون."

وتی سەرباری ئەوەش کە شاردراونەتەوە، زۆربەی تەقەمەنیە دەستکردەکانی داعش بە چەندین تۆڕەوە گرێدراون و تیمەکانی پاکردنەوە بە "تەڵەی مەرگ" ناویاندەبەن.

وتیشی: "چەکدارانی داعش تەقەمەنیە دەستکردەکانیان پڕکردووە لە تەقەمەنی سی فۆر و بۆڵبرین و بزمار و تەنانەت کیمیاییش."

پلانی لابردنی مینه‌كان

بەڕێوبەری گشتی بەڕێوبەرێتی چالاکی مین، عیسا فەیاز، وتی: "ئامانجی بابەتیانەمان راگەیاندنی ئەوەیە کە موسڵ و ناوچە رزگارکراوەکان لە تەقەمەنی پاککراونەتەوە."

فەیاز بە دیارونای وت: "کاردەکەین بە هەموو توانامانەوە بۆ ئەوەی سەرکەوین بەسەر ئەم بەربەسە گەورەەیەدا، چونکە راستەوخۆ کاریگەریی لەسەر ژیانی خەڵك هەیە."

وتی:"پلانێکی کارامان داناوە بەهاوکاری لایەنە ناوخۆیی و جیهانیەکان کە تا ساڵی 2021 بەردەوامدەبێت."

وتیشی پلانەکە سەرنجی لەسەر "پتەوکردن و گەشەپێدانی تواناکانمانە لە ناوچەکە بۆ لابردنی تەقەمەنیە دەستکردەکان و مین و بەرزکردنەوەی هۆشیاری گشتی لە سەر مەترسیەکان".

ئەم بابەتەت بەدڵە؟

1 Di icons no
* واتە ئەم خانەیە پێویستە
Captcha