http://diyaruna.com/ckb/articles/cnmi_di/features/2017/12/15/feature-04

×
×
تێرۆریزم |

بانکی ناوەندی عێراق هاوکاری دارایی تیرۆریزم دەکاتە ئامانج

خالید تائی

پۆلیسێکی عێراقی پارەی سەوزە و میوەکانی دەدات بە 10,000 دیناری کاغەزی عێراقی له‌ 22 تەمموز لە بەغدا. بانکی ناوەند دەیەوێت شێوازه‌ ئەلیکترۆنییەکان زیاتر بەکاربهێنێت بۆ کاری بانكی و بازرگانی رۆژانە وەکو بەشێك لە رێکارە نوێکان بۆ دژایەتیكردنی سەرچاوەی دارایی تیرۆریستان. [عەلی شوکر/ئاژانسی فرانس پرێس]

بانکی ناوەندی عێراق هەینی (15 کانونی یەکەم) رایگەیاند چەندین رێکاری پێشگریی گرتۆته‌به‌ر بۆ وشککردنی سەرچاوە داراییەکانی تیرۆریزم.

ئەیسەر جەبار، سەرۆکی راگەیاندنی بانکی ناوەندی عێراق، وتی رێکارە نوێکان بریتین له‌ "به‌كارهێنانی سیستمێکی ئەلیکترۆنی بۆ چاودێریکردنی جوڵەی پاره‌ و دانانی له‌ بانك."

جەبار وتی سیستمە نوێکە بەندە بە چەندین دەزگای دارایی و بانکیی دیکەوە و تیمە تایبەتەکانی بانکی ناوەندی عێراق بۆ چاودێریکردنی هەر جوڵەیەکی پاره‌ بەکاری دەهێنن.

وتیشی عێراق دەیەوێت شێوازه‌ ئەلیکترۆنییەکان زیاتربکات لە هەموو بوارەکانی چالاکی بانکی و ئاڵوگۆڕی رۆژانەدا و وتیشی بانکی ناوەند "هەنگاوی باش دەنێت بۆ کەمکردنەوەی ئاڵوگۆڕی پارە به‌ كاش."

هه‌روه‌ها وتی: "نوسینگه‌ی نه‌هێشتنی پارە سپیکردنەوەی بانکی ناوەندی عێراق هەوڵی زۆر دەدات بۆ شوێنکەوتنی هەموو ئاڵوگۆڕەکان به‌ پارەی كاش." ئاماژەی بۆ ئەوەش کرد كه‌ بەشی تایبەت لە بانکەکان و دەزگاکاندا بەرپرسن لە چاودێریکردنی ئەو ئاڵوگۆڕانە.

جەبار وتی سیستمی موشته‌ریه‌كانت بناسه‌ (Know your customer) بەکاردەهێنرێت لە بانکەکاندا بۆ ناسینەوەی بەکارهێنەرەکان.

وتیشی سیستمەکە رێگەدەدات بە بانکەکان به‌دواداچوون بكه‌ن بۆ سەرچاوەی دارایی موشته‌ریه‌كانیان لەگەڵ پێگەی یاساییان بۆ ئەوەی دڵنیابن هیچ گومانێك لە چۆنێتی دەستکەوتنی داراییان نییە، ئەمەش هاوکارە بۆ رێگرتن لە تاوانبارەکان بۆ به‌كارهێنانی بانکەکان.

ئەمنییەتی توند لە ناوچە رزگارکراوەکان

جەبار وتی بانکەکان و کۆمپانیاکانی ناردنی پارە لە ناوچەکانی لە دەستی "دەوڵەتی ئیسلامی" (ذاعش) رزگارکراون لەژێر وردبینی توندی بانکی ناوەندی عێراقیدان.

جه‌ختیشی كرد له‌ پێویستی گرتنه‌به‌ری "رێکاری وریایانه‌ له‌م لایه‌نه‌وه‌، وەك توێژینه‌وه‌ له‌ پێگەی یاسایی گشتی دامه‌زراوه‌ یان بانكه‌كه‌ و میتۆدەکانی کارکردن و گواستنه‌وه‌ی پارەی و هه‌روه‌ها پێداچوونەوە بە پاکی فایلە ئەمنییەکانی."

وتیشی ئەو رێکارانە هێنراونه‌ته‌كایه‌وه‌ بۆ "رێگرتن لەوەی ئەو دەزگایانە ببنە کەناڵی دارایی تیرۆریستەکان و هاوکاریکردنی ئۆپەراسیۆنە چەکدارییەکانیان."

هه‌روه‌ها وتی: "بانکی ناوەندی عێراق و حکومەت بەردەوامن لە گرتنەبەری هەموو ئەو هەنگاوانەی رێگە دەکەنەوە بۆ شوێنکەوتنی هەموو چالاکییە داراییەکان و رێگرتن لەوەی پارە بچێتە دەستی چەکدارانی داعش یان هەر گروپێکی تیرۆریستی دیکەوه‌."

وتی لە دوو ساڵی رابردوودا بانکی ناوەند چەندین کۆمپانیا و کەسایەتی خستۆتە لیستی رەشەوە بەهۆی پەیوەندییان بە دارایی تیرۆریزمەوە.

وتیشی بانکەکە کاری ئەو لایەنانەی وەستاندووە کە بەشێك بوون لە تیرۆریزم لە رێگای سڕکردنی موڵك و سەرچاوە ئابووریەکانیانه‌وه‌ لە هەموو بانکەکان و دەزگاکاندا.

لە 8 ئابدا بانکی ناوەندی عێراق رایگەیاندکۆمیتەیەکی تایبەتیی حکومی پێكهێناوه‌، بە هاوئاهەنگی لەگەڵ دەزگاکانی حکومەت بۆ بەرەنگاربوونەوەی سەرچاوە داراییەکانی تیرۆریزم.

ئەم بابەتەت بەدڵە؟
16

1 كۆمێنت

رێوشوێنەکانی کۆمێنت نوسین
Captcha
محمد | 2017-12-27

ئه‌و گەندەڵانه‌ی سودوه‌رده‌گرن لە نرخی گۆڕینەوەی دۆلار و نزمیی نرخەکەی بە بەراورد بە نرخی گۆڕینەوەی راستەقینەی لە بازاڕدا، دەبێت سزا بدرێن. ئەو جیاوازیە بۆ کوێ دەچێت؟ هەروەها پێویستە ئێمە ئەو یەدەگە بپارێزین و زیادی بکەین نەوەکو پارەی لێدەربکەین کە ئەمە نرخی دیناری عێراقی نزمدەکاتەوە و دواتر قەیران روودەدات. فەرمانبەران و ئەندامانی خێزانەکانیان دەبێت رێگەیانپێنەدرێت لە بەشداریکردن لەهەر پێشبینیكردنێكی نرخی دراودا. بانکیش لەسەدا 150 داهاتی دۆلارەکانی دەفرۆشێت و ئەمەش کارەساتە. ئەمە پێویستە چارەسەربکرێت بە بڕینی خەرجییەکان نەك پارە دەرکردن لە یەدەگ. سوپاس.

وه‌ڵام بده‌ره‌وه‌