بازاڕه‌كه‌ی شارۆچکەی مەرکەدە لە سوریا گەڕانەوەی باری ئاسایی بەخۆوەدەبینێت دوای ئەوەی "دەوڵەتی ئیسلامی" (داعش) لەوێ دەرپەڕێندرا له‌ 9 تشرینی دووەم.

شەقامەکانی ئه‌و شارۆچکه‌یه‌ كه‌ نزیکە لە شەدادییه‌وه‌ لە پارێزگای حەسەکە له‌ باشور، پڕبووە لە کڕیار دوای ئەوەی ئەو ناوچە ستراتیژییە لەلایەن هێزەکانی سوریای دیموکرات و ئەنجومەنی سەربازی دێرەزوورەوە رزگارکرا.

ژیان خێرا گەڕایەوە بۆ مەرکەدە، چونکە زۆربه‌ی دانیشتوانەکەی مانەوە لە کاتی شەڕی دەرپەڕاندنی داعشدا لەبەرئەوەی شەڕە سەرەکییەکان لە رۆخی شارۆچکەکە و گوندەکانی چواردەوری روویاندا.

ئەفسەری هێزەکانی سوریا دیموکرات، فەرهاد خۆجە، کە لەو ناوچەیە جێگیرە، وتی ئەو ناوچانەش بریتیبوون لە عەلوە شەمسانی، زه‌ینەت، جاد و عه‌ناد.

خۆجە بە دیارونای وت شارۆچکەكه‌ پاككراوه‌ته‌وه‌ له‌و مینانه‌ی داعش چاندبوونی و کاردەکرێت بۆ پاککردنەوەی گوندەکانی چواردەوری و ناوچە کشتوکاڵییەکان بۆ رێگەخۆشکردن بۆ دانیشتوانەکە تاکو بە ئازادی لە ناوچەکەدا بگەڕێن.

خۆجە وتی ئۆپەراسیۆنەکانی پاککردنەوە درێژەیانکێشا بەهۆی ئەو تونێلانەی چەکدارانی داعش بەکاریانهێنابوو وەك پەناگە لە کاتی ئۆپەراسیۆنە زەمینییەکان و هێرشە ئاسمانییەکانی هاوپەیماناندا.

رێگرتن لە دزەکردنی داعش

خۆجە وتی هێزەکانی سوریای دیموکرات چەندین بازگەیان لە دەروازەکانی شارۆچکەکە داناوە و لەو شوێنانە به‌دواداچوون بۆ ناسنامە و بەڵگەنامەکان ده‌كه‌ن و چاودێریی هاتن و چوون دەکەن بۆ رێگرتن لە هەوڵه‌كانی دزەکردنی داعش.

وتیشی مەترسی هەیە چونکە زۆربەی چەکدارەکانی داعش لە شەڕەکاندا هەڵهاتوون بۆ بەشەکانی دیکەی دێرەزوور.

هه‌روه‌ها وتی: "هاوئاهەنگی باش هەیە لەنێوان دانیشتوانەکە و هێزەکانی ئاسایشدا." ئاماژەی بۆ ئەوەش کرد کە "زۆربەی ئەندامانی ئاسایش خەڵكی مەرکەدە و شەدادی و دەشتەکانی حەسەکەن، ئەمەش دڵنیایی داوەتە دانیشتوانەکە."

دانیشتووی مەرکەدە و بازرگانی ئاژەڵ، فەیسەڵ مه‌شوح، بە دیاونای وت شارۆچکەکە بە بازاڕەکەی بەناوبانگە، چونکە بنکەی سەرەکی دانیشتوانی حەسەکە و شەدادی و دێرەزوورە.

وتی لەدوای دەرکردنی داعشەوە ژیان گەڕاوەتە بۆ بازاڕەکەش، کە هەموو جۆرە خواردن و سەوزە و ئاژەڵێكی تیادا دەستدەکەون.

مه‌شوح وتی: "نرخەکان باشن و بەرزبوونەوەی خێرایان بەخۆیانەوە نەبینیوە وەك هەندێك ناوچەی دیکە."

وتیشی: لەوانەیە ئەمە بۆ ئەوە بگەڕێتەوە كه‌ ئێرە ناوچەیەکی کشتوکاڵییە و خەڵکەکەی کاری کشتوکاڵ و ئاژەڵداری دەکەن و پەیوەندییەکی نزیکی خزمایەتیش لەنێوانیاندا هەیە كه‌ ده‌بێته‌ رێگر لەبه‌رده‌م هەلقۆستنەوەی بارودۆخه‌كه‌دا."

سەرکەوتنێکی سەربازی ستراتیژی

مه‌شوح وتی هه‌ڵكه‌وته‌ی شارۆچکەکە رێدەدات بازرگانەکان لە هەموو لایەکەوە بۆی بێن -- لە دێرەزوور، حەسەکە و تەنانەت لە عێراقیشەوە -- هەروەها هەبوونی ئەو هەموو شمەکە وایکردووە کەس بیرنەکاتەوە لە بەرزکردنەوەی نرخەکان.

چالاکوانی بواری کۆمەڵایەتی و میدیا، عەمار ساڵح، بە دیارونای وت رزگارکردنی مەرکەده‌ سەرکەوتنێكی سەربازی گرنگ بوو بەهۆی هه‌ڵكه‌وته‌ی ستراتیژیی شارۆچکەکەوه‌، چونکە لەسەر سنووری دیرەزوور و حەسەکەیە.

وتی وەکو شادەمارێکی گرنگی نێوان هەردوو ناوچەکەیە و رێڕەوێکی گرنی گەیاندنیشە لەنێوان دێرەزوور و عێراقدا.

وتیشی شارۆچکەکە زۆر نزیکه‌ لە بیری گازی عومەره‌وه‌، لەبەرئەوە "کۆنترۆڵکردنی مەرکەدە زۆر پێویستبوو بۆ دابینکردنی ئاسایش و ئارامی لە ناوچەکانی دەورووبەری حەسەکە و دێرەزوور."

هه‌روه‌ها وتی شارۆچکەکە ئێستا لەلایەن پیرانی خێڵه‌كانه‌وه‌ بەڕێوەدەبرێت و هاوئاهەنگییان لەگەڵ سەرۆکایەتی هێزەکانی سوریای دیموکراتدا هەیە بۆ دڵنیابوونەوە لە گەڕانەوەی ژیانی ئاسایی و رێگرتن لە دزەکردنی چەکدارانی داعش بۆ ناوچەکە.