http://diyaruna.com/ckb/articles/cnmi_di/features/2017/06/19/feature-03

×
×
تێرۆریزم |

بانکی ناوەندی عێراق کۆمپانیایەکی ئاڵوگۆڕی پارە دەخاتە لیستی رەشەوە بەهۆی پەیوەندیی بە تیرۆریستانەوە

خالید تائی

بەرپرسانی بانکی ناوەندیی عێراق و وەزارەتی گەنجینەی ئەمریکا لە بەغدا کۆبوونەوە بۆ گفتوگۆکردن دەربارەی رووبەڕووبوونەوەی پاڵپشتیکردنی دارایی تیرۆریزم. بانکەکە کۆمپانیایەکی ئاڵوگۆڕی پارەی لە ئەنبار خستە لیستی رەشی گروپە تیرۆریستییەکانەوە بەهۆی تێوەگلانیەوە لەگەڵ داعش و قاعیدە. [خاوەندارێتی وێنە: بانکی ناوەندیی عێراق]

بانکی ناوەندیی عێراق دووشەممە (19 حوزەیران) پشتڕاستیکردەوە کە کۆمپانیایەکی گواستنەوەی پارەی ئەنباری خستۆتە لیستی رەشەوە بەهۆی تێوەگلانیه‌وه‌ لە گواستنەوەی پارە بۆ رێکخراوی "دەوڵەتی ئیسلامی" (داعش) و قاعیدەوە.

وتەبێژی بانکی ناوەندی، یوسر جەبار، بە دیارونای وت: "بانکەکە [یەکشەممە] کۆمپانیای کەوسەر بۆ ئاڵوگۆڕی پارەی خستە لیستی رەشەوە، کە [بنكه‌كه‌ی] لە قائیمی پارێزگای ئەنبارە."

جه‌بار وتی: "کۆمپانیاکە، کە لەلایەن عومەر محەمەد رەحیم کوبەیسییەوە خاوەندارێتیی دەکرێت، تێوەگلاوە لە دابینکردنی دارایی و پاڵپشتی بۆ گروپە تیرۆرستییەکان."

وتیشی بانکەکە هەنگاوی توندی ناوە بۆ رێگرتن لە هەر ئاڵوگۆڕێکی بانکی یان دارایی کە هەڕەشە لە ئاسایشی نیشتیمانی بكات.

جه‌بار روونیکردەوە: "کاتێك لەلایەن بەشی کۆنترۆڵ یان داراییەوە دەربارەی ئەو جۆرە ئاڵوگۆڕانە ئاگاداردەکرێینەوە، دەستبەجێ کۆمپانیای پەیوەندیدار قەدەغەدەکەین، هەموو مامەڵەیەکی راستەوخۆ و ناڕاستەوخۆی لەگەڵدا دەوەستێنین و سەرمایەکەی سڕدەکرێت."

رێگرتن لە پاڵپشتی دارایی

جەبار وتی: "ئۆفیسێکی تایبەت هەیە لە بانکەکەدا بۆ رووبەڕووبوونەوەی شۆردنەوەی پارە. لەڕووی کارگێڕییەوە سەربەخۆیە، بەگوێرەی یاسای عێراقی بۆ رووبەڕووبوونەوەی پارە شۆردنەوە و پاڵپشتی دارایی تیرۆریستانی ژمارە 39 ساڵی 2015."

وتیشی یەکێك لە ئەولەویەتە باڵاکانمان شەڕکردنە دژی هەموو چالاکییەکی پەیوەندیدار بە پاڵپشتی دارایی تیرۆریزمەوە. هه‌روه‌ها وتیشی یارمەتیدەربووە لە "رێگرتن لە مامەڵە داراییەکانی داعش و پاراستنی سیستمی دارایی وڵاتەکە دژی قۆستنەوە لەلایەن گروپە تیرۆرستییەکانەوە".

جه‌بار وتی: "لە سەرەتای ساڵی رابردووەوە تائێستا، نزیکەی 100 کۆمپانیای گواستنەوەی پارە و پیشه‌وه‌رانی بانکمان خستۆتە لیستی رەشەوە."

وتیشی ئەم کۆمپانیایانە لە موسڵ و کەرکوك و بەغدا نوسینگەیان هەبووە.

هه‌روه‌ها وتی: "عێراق پابەندە بە هەموو ستاندارد و بڕیارەکانی ئۆفیسی کۆنترۆڵی کاڵا بیانییه‌كانی سەربە وەزارەتی گەنجینەی ئەمریکاوە بۆ شەڕکردن دژی پشتگیریی دارایی تیرۆرستان."

جه‌بار وتیشی: "هەوڵەکانمان لە چاودێری و جێبەجێکردنی ئەم ئەرکانە ستایشیانکراوە لەلایەن سیستمی دارایی نێودەوڵەتییەوە و لەئێستادا عێراق بۆتە ئەندامێکی کاریگەری ئەو سیستمە."

ئەم بابەتەت بەدڵە؟
4

0 كۆمێنت

رێوشوێنەکانی کۆمێنت نوسین
Captcha