![ئاواره‌كانی خۆرئاوای موسڵ په‌ناده‌به‌ن بۆ كه‌مپه‌كانی باشوری شاره‌كه. [خاوەنی وێنە: وه‌زاره‌تی بازرگانیی عێراق]](/cnmi_di/images/2017/03/28/7505-Iraq-Mosul-displacement-700_496.webp)
كاتێك له خۆرئاوای موسڵ هه‌ڵهات بۆ كه‌مپێك له ده‌ره‌وه‌ی شار، ئه‌بو ساڵح جوحه‌یشی سوربوو له‌سه‌ر ئه‌وه‌ی كچێكی گه‌نجی دراوسێ مه‌سیحیه‌كه‌شیان له‌گه‌ڵ خۆی ببات و به‌هه‌مانشێوه‌ی كچه‌كانی خۆی بیپارێزێت.
له ڤیدیۆیه‌كدا كه له‌سه‌ر تۆڕه كۆمه‌ڵایه‌تییه‌كان بڵاوبووه‌ته‌وه، جوحه‌یشی باس لەوە دەکات کە چۆن نه‌یتوانی دراوسێ ئاسوریه‌كه‌ی له شاره‌كه‌دا به‌جێبهێڵێت كه به‌ته‌نها له‌ماڵه‌وه مابووه‌وه.
وتی: "به‌جێیناهێڵم تا نه‌یده‌مه ده‌ست پوره‌كانی كه له به‌سره ده‌ژین. ئه‌م كچه بووه به یه‌كێك له كچه‌كانی خۆم."
ئه‌ندامی لیژنه‌ی ئه‌منی له ئه‌نجومه‌نی پارێزگای نه‌ینه‌وا، حه‌سه‌ن شوبه‌یب سه‌بعاوی، به دیارونای وت چیرۆكی له‌م بابه‌ته ئه‌و میهره‌بانییه ده‌رده‌خه‌ن كه خه‌ڵكی موسڵی پێناسراوه، ته‌نانه‌ت كاتێك روبه‌ڕوی تاریكترین هه‌لومه‌رجیش دەبنه‌وه.
وتی به‌رده‌وام چیرۆكی له‌م بابه‌ته هه‌ن ده‌رباره‌ی ئه‌و دانیشتوانانه‌ی كۆمه‌كی یه‌كتر ده‌كه‌ن و پشتی یه‌كتر ده‌گرن، "ته‌نانه‌ت گه‌ر له كه‌مپی ئاواره‌كانیشدا بن".
وتیشی له‌كاتێكدا هێزه ئه‌منیه‌كان ده‌ركیان به‌و هه‌ستی برایه‌تییه كرد له‌نێوان دانیشتوانی شاره‌كه‌دا، ده‌ستیانكرد بە دابه‌شكردنی مۆڵه‌تی ئه‌منی كه رێ به دانیشتوانی خۆرئاوای موسڵ بدات په‌ناببه‌نه به‌ر خه‌ڵكی خۆرهه‌ڵاتی موسڵ و گونده‌كانی ده‌وروبه‌ری.
وه‌زیری كۆچ و كۆچبه‌ران، جاسم محه‌مه‌د جاف، وتی تاكو 16 ئازار نزیكه‌ی 54,200 دانیشتوانی ئاواره‌بوو جێگای خۆیانكردۆته‌وه له‌لای خێزانه‌كان یان هاوڕێیانی خۆیان له به‌شی خۆرهه‌ڵاتی شاره‌كه و ناوچه رزگاركراوه‌كانی باشور، له‌وكاته‌وه‌ی ئۆپه‌راسیۆنی رزگاركردنی خۆرئاوای موسڵ ده‌ستیپێكردووه.
به‌شكردنی له‌ته نانێك له‌گه‌ڵ یه‌كتر
ئه‌ندامی ئه‌نجومه‌نی پارێزگای نه‌ینه‌وا، هیام عه‌بدال، به دیارونای وت: "به‌شكردنی له‌ته نانێك له‌گه‌ڵ دانیشوانه ئاواره‌كان له‌كاتێكدا خۆت له ناهه‌مواریدا به‌سه‌ربه‌ریت، خۆی له‌خۆیدا ئەستەمە."
خاتو هیام وتی: "له‌گه‌ڵ هه‌موو ئه‌مانه‌شدا [خه‌ڵكی خۆرهه‌ڵاتی موسڵ] ده‌رگاكانیان داناخه‌ن به‌ڕوی هیچ ئاواره‌یه‌كی به‌شی خۆرئاوادا."
وتی هه‌روه‌ها مزگه‌وته‌كانیش ده‌رگاكانیان واڵاكردووه بۆ ئاواره‌كان، له‌كاتێكدا زۆریش چوون تا له‌گه‌ڵ خه‌ڵكی گه‌یاره و حه‌مام عه‌لیل و گونده‌كانی ده‌وروبه‌ردا بژین.
عه‌بدال داوای له حكومه‌تی فیدراڵ كرد تا كۆمه‌كی مرۆیی بۆ ئاواره‌كان زیادبكات و وتیشی ئه‌و جێگا و خۆراك و خزمه‌تگوزاریه پزیشكییانه‌ی دابینكراون به‌شی پێداویستییه‌كانیان ناكه‌ن.
هه‌روه‌ها داوایكرد كه بێ دواكه‌وتن و به‌ته‌واوی هه‌موو خۆراكه‌كانی كارتی بەشەخۆراك بۆ دابینبكرێت، چونكه ئه‌م جۆره كۆمه‌كه له دوو ساڵی رابردوودا وه‌ستابوو به‌هۆی ده‌ستگرتنی داعش به‌سه‌ر شاره‌كه‌دا.
په‌رله‌مه‌نتاری عێراقی و ئه‌ندامی لیژنه‌ی ژنان له په‌رله‌مان، ئینتیسار جبوری، داوای له حكومه‌تی فیدراڵ كرد كه هه‌موو تواناكانی بخاته‌گه‌ڕ بۆ دابینكردنی كۆمه‌ك بۆ ئاواره‌كان.
خاتو ئینتیسار وتی: "ئاواره‌كان به‌ده‌ست كورتهێنانێكی سه‌ختی خۆراكه‌وه ده‌ناڵێنن و هه‌روه‌ها مه‌ترسیی كۆلێراش،" به‌هۆی كۆبوونه‌وه‌ی ئاوه‌ڕۆ له كه‌مپه‌كانی ئاواره‌بوواندا.
ئه‌م وتاره زۆر باشه. به‌ڵام له‌وباوه‌ڕدام بێسووده. كێ ئه‌ڵێت به‌شكردنی نانێك ئاسته‌نگه؟ ئایا موچه‌كه‌ی و ده‌ستكه‌وته‌كانی به‌شكردووه له‌گه‌ڵ ئاواره‌كانی 2014 یان ئه‌وانه‌ی ئێستا؟ هه‌ندێك هه‌ن قسه‌كانیان كرداری به‌دوادا نایه‌ت.
وه‌ڵام بده‌ره‌وه1 كۆمێنت