شەڕێکی سەخت بەڕێوەدەچێت لە ناوچەی بادیەی ناوەندی سوریا، لەنێوان لایەنی ئۆپۆزسیۆن جەیش مغاویر ئەلسەورە (سوپای کۆماندۆ شۆڕشگێڕەکان) و "دەوڵەتی ئیسلامی لە عێراق و شام" (داعش)دا.

بەرپرسانی باڵای سەربازیی بە دیارونایان وت جەیش مغاویر ئەلسەورە بەشێکی گەورەی بیابانی حەمادی سوریای رزگارکردووە و ناوچەکە پاکدەکاتەوە لە بۆمبی دەستکرد کە داعش چاندوونی پێش کشانەوەی.

ڤیدیۆیەك کە لە 11ی ئازار بڵاوکراوەتەوە ئەندامێکی گروپەکە نیشاندەدات کە ئاڵای داعش دادەگرێت -- لەلایەن داعشەوە وەك رەمزی بەناو دەوڵەتەکەی دادەنرێت -- لەسەر بورجێکی پشتگوێخراو لە بیابانی حەماد و لەجێگەی ئاڵای شۆڕشی سوریا هەڵدەکات.

سەرەڕای بۆمبڕێژکردنی کەلوپەلی مەتبەخ و ماڵەکان، داعش بۆمبی لە ئاڵاکەشیدا دەشاردەوە، ئەم هەنگاوەش لەلایەن فەرماندە سەربازییەکان و پسپۆڕانەوە وەك بێڕێزی بە بیروباوەڕی ئیسلامی لەقەڵەمدەدرێت.

فەرماندەی جەیش مغاویر موقەدەم موهەنەد تەللاع بە دیارونای وت گروپەکە لە 400 چەکداری سوری پێکدێت کە پێشتر شەڕی داعشیان کردووە لەژێر ئاڵای سوپای سوریای ئازاددا و لە ناوچەی بادیەی سوریا، دێرەزوور، حومس، حەلەب و دیمەشقەوە هاتوون، لەگەڵ ژمارەیەك لە چەکداری خێڵەکیی.

وتی ئامانجی سەرەکیی گروپەکە "نەهێشتنی ستەمە کە لە خەڵکە مەدەنییەکەمان کراوە و سڕینەوەی تیرۆرزمە".

تەللاع وتی ئۆپەراسیۆنە سەربازییەکانی ئێستا لە ناوچەی حەماد چڕبوونەتەوە پێش ئەوەی بڕۆین بۆ رزگارکردنی ئەو شار و شارۆچکانەی لەژێردەستی داعشدان.

وتی: "چەکدارانی جەیش مغاویر ئۆپەراسیۆنی کەشف و چاودێریی ئەنجامدەدەن بۆ دیاریکردنی ئامانجەکانی داعش، دوای ئەوەش هێزەکان هێرشی زەمینی دەکەن بە پاڵپشتیی ئاسمانیی هاوپەیمانی نێودەوڵەتییەوە."

هاریکاریی لەگەڵ هاوپەیمانان لەڕێگەی ژوری ئۆپەراسیۆنە هاوبەشەکانەوە ئەنجامدەدرێت کە ئۆپەراسیۆنی کەشف، چاودێریی و بەدواداچوون رێکدەخات.

رۆژنامەنووسی سوریی محەمەد عەبدوڵا وتی ئۆپەراسیۆنەکەی ئێستای ناوچەی بادیە "یەکێکە لە قورسترین کردە سەربازییەکان کە هەر گروپێك" رووبەڕووی ببێتەوە.

وتی جوگرافیای سەختی خاکی بیابان بە ناوچەی فراوان و دۆخی سروشتی سەختیەوە زۆر قورسە بۆ بزاوتن، بە ئاماژەکردن بەوەی زۆری دەوێت تا شوێنی تەواو و رێگاکان دیاریدەکرێن، تەنانەت بە ئامێری رێنیشاندەری نوێش.

بێڕێزیی داعش لە ئایین

تەللاع وتی داعش زۆر بۆمبی چێنراو و مینی زەمینی جێدەهێڵێت، وتیشی کە ئەوە "شێوازی کاری ستاندەری گروپەکەیە".

وتی، "گروپەکە هەمووشتێك بۆمبڕێژدەکات، لەنێویاندا ئاڵای رەش،" وتیشی کە دەستکاریی ئاڵاکەی کردووە و ماناکەی گۆڕیوە "وەك چۆن چەندین بنەمای ئیسلامیی گۆڕیوە".

تەللاع وتی: "گروپەکە گرنگیی بە ئاڵا و ئایین نادات و تەنیا خوازیاری لەناوبردنی گەورەترین ژمارەی رکابەرەکانیەتی، جا مەدەنیی بن یاخود نا."

وتی یەکەکانی جەیش مغاویر ناوچە رزگارکراوەکان پاکدەکەنەوە لە مین و شمەکی بۆمبڕێژکراو کە "بەداخەوە ژیانی چەندین مەدەنیی کردۆتە قوربانیی".

رۆژنامەنوس عەبدوڵا وتی داعش ئەم تاکتیکەی لە زیاد لە ناوچەیەکی سوریا بەکارهێناوە، وتیشی کە ژمارەیەك مەدەنی و چەکداری ناوچە ئازادکراوەکان بوونەتە قوربانیی ئاڵا، مزگەوت و تەنانەت قورئانی بۆمبڕێژکراو.

وتی، "[داعش] سەرەتا بێڕێزیی بە ئاڵای ئیسلامی کرد کاتێك کردی بە رەمزی خۆی بە پێچەوانەی رێنماییەکی ئاینی ئیسلامەوە، ئاڵای ئیسلامی کرد بە ئاڵایەك کە لە جیهاندا بۆتە رەمزی تیرۆریزم و کوشتار،" بە ئاماژەکردن بەوەی سوتاندنی ئاڵاکە بەڵگەیەکی دیەکیە لەسەر بێڕێزیی گروپەکە بەرامبەر ئایین.

شێخ موعاز عەبدولکەریم، وتاربێژی پێشتر لە مزگەوتی عومەر لە حەلەب کە ئێستا لە حەلەب نیشتەجێیە وتی: "ئەو بۆمبڕێژییانەی داعش جێیهێشتوون بەڵگەی کردەی تاوانکاری بە بەرنامەی گروپکەیە، چونکە زۆر ئەگەر هەیە ئەم مینانە مەدەنی برینداربکەن چونکە لە ماڵ و ناوچە کشتوکاڵییەکاندا چێنراون."

وتی ئیسلام بە توندی بەئامانجکردنی مەدەنی لە شەڕدا قەدەغەکردووە.

عەبدولکەریم ستایشی جەیش مغاویری کرد بۆ دەستکەوتەکانی لە ناوچەی بادیەی سوریا و بۆ هەڵکردنی ئاڵای شۆڕشی سوریا لە ناوچەی بیاباندا.

وتی: "بەڕاستی دۆخی سوریا ئەو لایەنە چەکدارانەی دەخوازێت کە لایەنگریی ئایدۆلۆژیای تیرۆرستیی نین و لەسەر بنەمای باوەڕی خۆیان کاردەکەن لە رزگارکردنی خاك و خەڵكدا."