هه‌واڵه‌كانی عێراق
تێرۆریزم

عێراق هەنگاوی نوێ دەنێت بۆ بڕینی پاڵپشتی دارایی تیرۆر

خالید تائی

ئەنجومەنی وەزیرانی عێراق بڕیاری دەستبەسەراگرتنی موڵکە داراییەکانی گروپە توندڕەوەکانی دا لە دانیشتنێکیدا رۆژی 18 ئەیلول. [خاوەنی وێنە: نوسینگەی سەرەکوەزیرانی عێراق حەیدەر عەبادی]

ئەنجومەنی وەزیرانی عێراق بڕیاری دەستبەسەراگرتنی موڵکە داراییەکانی گروپە توندڕەوەکانی دا لە دانیشتنێکیدا رۆژی 18 ئەیلول. [خاوەنی وێنە: نوسینگەی سەرەکوەزیرانی عێراق حەیدەر عەبادی]

حکومەتی عێراق هەنگاوێکی نوێی ناوە بەرەو جێبەجێکردنی یاسای دژ بە پارەشتنەوە و کۆمەککردنی دارایی تێرۆری ساڵی 2015 بە دەستبەسەراگرتنی موڵكە داراییەکانی گروپە توندڕەوەکان.

ئەم رێوشوێنە نوێیە کە لە کۆبوونەوەی 18 ئەیلولی ئەنجومەنی وەزیراندا بڕیاری لەسەر درا، ئامانجی بنبڕکردنی سەرچاوەکانی کۆمەکی دارایی گروپە توندڕەوەکان و دامرکاندنەوەی چالاکیە تاوانکاریەکانیانە.

راوێژکاری ئابوریی سەرۆك وەزیران، موزهیر محەمەد ساڵح، بە دیارونای وت ئەم بڕیارە بەپێی یاسای هەموارکراوی ژمارە 39 ی ساڵی 2015 دژ بە پارەشتنەوە و کۆمەکی دارایی تێرۆر.

ناوبراو وتی ئەم یاسایە کە ئەیلولی پار خرایەکار، بەمەبەستی دەرکردنی "زنجیرەیەك بڕیار و رێسا بوو بۆ قەڵاچۆکردنی جوڵەی پارەی نایاسایی بەگوێرەی رێوشوێن و پەیماننامە نێودەوڵەتیەکان".

وتیشی: "بەپێی ئەم یاسایە ئێستا عێراق بەرپرسیارە بەرامبەر کۆمەڵگای نێودەوڵەتی بۆ گرتنەبەری رێوشوێنی کارگوزاری و خۆپاراستن بۆ رێگرتن لە کۆمەکی دارایی تێرۆر."

ساڵح وتی: "لەپاڵ ئەمەشدا، دەبێت لەمبارەیەوە هاوکاریی وڵاتانی جیهان بکات بۆ گۆڕینەوەی زانیاری و شارەزایی." ئاماژەشی بەوە دا کە ئەمە کۆمەکی بەگژاچوونەوەی شتنەوەی پارە و بەکارهێنانی بۆ پشتگیریکردنی دارایی چالاکیە تێرۆریستیەکان و تاوانە رێکخراوەکان دەکات.

وتی ئەم هەنگاوە نوێیە "جددیەتی عێراق و خواستی پیشاندەدات بۆ پتەوکردنی هەوڵە هاوبەشەکانی لەگەڵ وڵاتانی دیکە و رێکخراو و دامودەزگا نێودەوڵەتیەکان بۆ بەدواداچوونی سەرچاوەکانی دارایی کەس و گروپە تێرۆریستیەکان".

وتیشی گروپە توندڕەوەکان پارەکانیان لەژێر پەردەی بەخشین و پەردەپۆشیی نایاسایی تردا دەجوڵێنن و دەستبەسەرداگرتنی ئەم پارانە پشتگیری لە هەوڵە نێودەوڵەتیەکان دەکات بۆ وشککردنی سەرچاوە داراییەکانیان و سنوردارکردنی چالاکیە تاوانکارانەکانیان.

هەروەها وتی: "هێزەکانی عێراق سەرکەوتنی گەورەیان بەدەستهێناوە دژبە تێرۆریستان و توانیویانە کاریگەرییان کەمبکەنەوە و لە زۆر شار دەریانپەڕێنن. بەم بڕیارە نوێیەی، حکومەت سوربوونی عێراق لەسەر شەڕکردن دژی تێرۆریزم دەسەلمێنێت، هەم بە هێزی چەکدارانە و هەم لەڕێگای کەناڵە یاساییەکانەوە."

'بڕیارێکی توند و رێگر'

پەرلەمەنتاری عێراقی و ئەندامی لیژنەی ئاسایش و بەرگری، ئەسکەندەر وتوت، وتی ئەم هەنگاوەی حکومەت "بڕیارێکی توند و رێگرە کە کاریگەریی گرنگی دەبێت بۆسەر ئاسایشی ناوخۆ و نێودەوڵەتیش".

وتوت بە دیارونای وت: "بەگژاچوونەوەی پارەشتنەوە لەڕێگای چاودێری و بەدواداچوونی حسابی بانکیی وەهمی و حەواڵەکردنی بازرگانی و چالاکیە گومانلێکراوەکان یەکێکە لەو رەوشە گرنگانەی پێویستە بۆ رێگاگرتن لە چالاکیی تێرۆریستی."

وتیشی گروپەکان زۆر بەچڕی پشت بەم "پارە پیسە" دەبەستن بۆ خەرجیی چالاکیەکانیان و مسۆگەرکردنی بەردەوامییان لە ناوخۆ و جیهانیشدا." هەروەها وتی ئەم یاسا نوێیە لەو داهاتانە بێبەشیان دەکات کە دەشێت سەرچاوەیەکی دارایی گەورە پێکبهێنن بۆیان.

ویتویت وتی: "هەروەها بڕیارەکە هەلی بەدواداچوون و راوەستاندنی هەموو دەستکەوتەکانی ئەو کەسانە دەڕەخسێنێت کە بەیاسایی سەلمێندراوە دەستیان لە تێرۆریزمدا هەیە. داواشی لە کۆمەڵگای نێودەوڵەتی کرد بۆ پشتگیریکردن و هاوکاریکردنی عێراق و یارمەتیدانی لە بەگژاچوونەوەی پارەشتنەوە و داراییکردنی تێرۆردا.

ئامرازی سەرەکی لە شەڕی دژە تێرۆردا

پەرلەمەنتاری عێراقی و ئەندامی لیژنەی ئابوری، عەبدولسەلام مالیکی، وتی ئەم بڕیارەی حکومەت کە "دەمێکبوو چاوەڕێی بووین، ئامرازێکی گرنگە لە شەڕی دژ بە تێرۆریزمدا".

مالیکی بە دیارونای وت بریارەکە "هەنگاوێکی گەورەیە بەئاراستەیەکی راست"، بەتایبەتی کە لەکاتێکدا دێت زنجیرەیەك سەرکەوتنی سەربازی دژ بە "دەوڵەتی ئیسلامی لە عێراق و شام" (داعش) لە عێراق تۆمارکراوە.

وتی: "بڕیارەکە بەگژ سەرچاوە داراییەکانی تێرۆریستان و جوڵەی نایاسایی پارەدا دەچێتەوە و دەست بەسەر ئەوە پارانە دەگرێت کە [داعش] پەیدایکردوون لەڕێگای دزینی سامانی نەوتی وڵاتەکە و تاڵانکردنی موڵکوماڵی گشتیی دەوڵەتەوە لەکاتی داگیرکردنی شارەکاندا."

وتیشی: "دەبێت هەموو توانا نیشتمانیەکانمان بخەینەگەڕ بۆ مسۆگەرکردنی جێبەجێکردنی بڕیارەکە و کردنەوەی بەرەیەك بۆ شەڕێکی درێژی ئابوری دژ بە تێرۆریستان بۆ داماڵینیان لە هەموو ئەو رەگەزانەی پێویستیانە بۆ مانەوە و بەردەوامیدان بە چالاکیەکانیان."

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500