هێزێکی عێراقی ناوخۆیی بەناوی "نەوادر" دەستیگرتووە بەسەر خاڵێکی سنوریی گرنگدا لە رۆژئاوای پارێزگای موسڵ کە "دەوڵەتی ئیسلامی لە عێراق و شام" (داعش) بەکاریدەهێنا وەك راڕەوێكی ستراتیژی بۆ جموجۆڵ لەنێوان سوریا و عێراقدا.

ئەم هێزە پێکهاتووە لە جەنگاوەرە عەرەبە سونەکانی سەربە خێڵی شەمەر و خۆبەخشە یەزیدیەکان، وەك دامەزرێنەرەکەی، پەرلەمەنتاری عێراقی عەبولڕەحیم شەمەری، وتی.

لەچاوپێکەوتنێکدا لەگەڵ دیارونا لە 22 تەمموز، شمەری وتی هێزەکە، کە لە مانگی شوباتدا دامەزراوە، زیاتر لە 1,500 جەنگاوەر لەخۆدەگرێت، نیوەیان سەربە خێڵەکەی خۆین و نیوەکەی تریشی جەنگاوەری یەزیدین.

وتیشی: "لەکاتی راگەیاندنیەوە، هێزی 'نەوادر' ئەرکی ئەوەی لەئەستۆ گرتووە کە روبەڕوی داعش ببێتەوە و لەو ناوچانەی رۆژئاوای موسڵ دەریانپەڕێنێت کە دەستیان بەسەرداگرتووە."

هەروەها وتی: "لەکۆتایی مانگی ئازاردا توانیمان ناوچە سنوریە گرنگەکانی دەوروبەری بێجی رزگاربکەین، لەوانە ناوچەی ئوم زیبان کە پێکهاتووە لە نزیکەی 16 گوند و نۆ گوندی تریش کە سەربە ناوچەی ئوم جەریسن."

شمەری وتی: "لەکاتی شەڕی رزگارکردندا زیاتر لە 100 چەکداری داعش کوژران و زیانی ماددی سەختیان لێکەوت. ئێستاش جەنگاوەرەکانمان دەسەڵاتی تەواویان بەسەر ئەم گوندانەدا سەپاندووە و هێڵی بەرگری و خاڵی کۆبوونەوەی هاوبەشیان تێدا دامەزراندوون."

وتی خاڵی پەڕینەوەیەی سەر سنوری سوریا کە بە رێگای موسڵ-رەققە ناسراوە و جموجۆڵێکی زۆری شەڕکەرانی داعشی لێدەبینرا کە دەهاتنەناو عێراقەوە، "ئێستا ئەمینە و هیج حاڵەتێکی دزەکردنی لێ بەدیناکرێت".

ئەم فەرماندەیەی هێزەکە داوای لە حکومەتی عێراقی کرد کە جەنگاوەرەکانی وەك شەڕکەری فەرمی تۆماربکات و چەک و ئۆتۆمبیل و پشتگیریی ئاسمانیی زیاتریان پێببەخشێت.

شمەری وتیشی: "ئەو دانیشتوانەی لە رۆژئاوای نەینەوا لەلایەن داعشەوە گەمارۆدراون، داوا لە ئێمە و هێزە ئەمنیەکان دەکەن بەزووترین کات رزگاریان بکەن و بەردەوام زانیاریی هەواڵگریمان پێدەبەخشن و هەمیشە ئامادەی هاوکاریکردنمانن و پشتگیریی هەر ئۆپەراسیۆنێکی سەربازی دەکەن کە لەدەست تێرۆریستان رزگاریانبکات."

هەوڵەکانی هاوکاریکردن

ئەندامێکی ئەنجومەنی پارێزگای نەینەوا، عەبدولڕەحمان وەکاع، وتی: "جەنگاوەرانی نەوادر جێگای گرنگیان بەدەستەوەیە لەسەر سنوری سوریا و رێگایان لە ئەندامانی داعش گرتووە دزەبکەن و پەیوەندی بە هێزەکانیانەوە بکەن لە موسڵدا."

وەکاع وتی هێزەکە چەند شەڕێکی لەگەڵ داعش کرد کە "تیایاندا تێرۆریستەکان زیانی سەختیان لێکەوت و ئەو خاڵی پەڕینەوەیەیان لێگیرا کە لە شاری رەققەی سورییەوە درێژدەبێتەوە بۆ موسڵ".

وتیشی حکومەتی ناوخۆیی هەوڵدەدات تواناکانی هێزەکە باشتربکات "لەناو سیستمی بەرگریی نیشتمانیدا بۆ پتەوکردنی شەڕ دژی تێرۆریزم و دەرپەڕاندنی ئەندامانیان لە پارێزگای نەینەوا و سەرتاسەری وڵاتدا".

ئەفسەرێکی پێشووی سوپای عێراق، ئەحمەد شەریفی، وتی شەڕی دژ بە داعش "پێویستی بە هەوڵی هەموولایەك هەیە، بێ جیاوازی".

شەریفی بە دیارونای وت: "بەشداریی دانیشتووان لە شەڕەکاندا لایەنێکی گرنگی بردنەوەی شەڕە دژ بە تێرۆریزم و ئەو بەشداربوونەش دەبێت پتەوتربکرێت بۆ خۆئامادەکردن بۆ ئەوکاتەی داعش دادەڕمێت."

وتیشی هێزەکانی نەوادر و هێزە ناوخۆییەکانی تری هاوشێوەیان بەشدارییەکی سەربازیانەی کاریگەریان هەیە لە شەڕدا بۆ رزگاکردنی عێراق لە داعش و قوربانیی زۆریش دەدەن.

هەروەها وتی: "بەبڕوای من دەبێت لە زۆر حاڵەتدا پشت بە دانیشتوانی ناوچەکان ببەستین بۆ سەپاندنی ئاسایش و سەقامگیری لە ناوچە رزگارکراوەکاندا و پاراستنیان لە گەڕانەوەی تێرۆریستان بۆیان."