هێزەکانی عێراق و جەنگاوەرە خێڵەکیەکان ئۆپەراسیۆنێکی سەربازیی دەستپێدەکەن بۆ رزگارکردنی ئەو ناوچانەی رۆژئاوای ئەنبار کە هێشتا لەژێردەستی "دەوڵەتی ئیسلامی لە عێراق و شام" (داعش)دا ماونەتەوە.

ئەم هێزە هاوپەیمانانە پێشڕەوییەکی باشیان بەدەستهێناوە لە تەئمینکردنی ناوچەکانی دەوروبەری لای سەرەوەی روباری فورات کە لە بەشی باکوری دورگەی خالیدیەوە لە شاری هیت درێژدەبێتەوە تا دەگاتە شارۆچکەی بەروانە نزیك بە حەدیسە.

هێزەکانی عێراق "بەپشتیوانیی جەنگاوەرە خێڵەکیەکان و هێزی ئاسمانی هاوپەیمانان توانییان دەست بەسەر زۆربەی ناوچە بیابانیەکاندا بگرن" لە ناوچەکە، فەرماندەی ئۆپەراسیۆنەکانی جەزیرە، لیوا روکن قاسم محەمەدی، رۆژی 20 تەمموز وتی.

محەمەدی بە دیارونای وت: " ئۆپەراسیۆنەکە بەشێکە لە هەڵمەتێکی سەربازیی گەورەتر بۆ رزگارکردنی پاشماوەی ناوچە داگیرکراوەکانی رۆژئاوای ئەنبار، لەوانە عەنە، راوە، قائیم و عەکاشات هەتا دەگاتە سەرسنورەکانی سوریا و ئەردەن."

وتیشی هێزەکانی پشتگیری گەیشتوونەتە سەربازگەی عەین ئەلئەسەد لە شارۆچکەی بەغدادی کە 1,000 سەرباز لەوێ بڵاوکراونەتەوە بۆ پشتگیریی ئەو هێزانەی لە ئۆپەراسیۆنە سەربازیەکەدا بەشدارن.

هەماهەنگی لەگەڵ پیرانی خێڵەکان

محەمەدی رونیکردەوە: "لەماوەی چەند رۆژی پێشوودا، چەند کۆبوونەوەیەکمان لە شارۆچکەی عامریەی فەلوجە سازکرد لەگەڵ ژمارەیەك لە پیرانی خێڵەکانی رۆژئاوای ئەنبار بەمەبەستی دۆزینەوەی رێگاکانی هاوکاری لەنێوان هێزە ئەمنیەکان و خەڵکی ناوچەکان."

وتی پشتگیریی خێڵەکان کلیلی سەرکەوتنی هەر ئۆپەراسیۆنێکی سەربازیە، چونکە ئەوان شارەزای جوگرافیای ناوچەکەن و دەتوانن تێرۆریستەکان بناسنەوە بەناو یان روخساریاندا و شارەزایی و تواناییان هەیە لە پاراستنی ئاسایشی خۆیان.

ئەم فەرماندەیە جەختی کردەوە لەسەر گرنگیی "هێزی ئاسمانی هاوپەیمانان لە تێکشکاندنی عەمبارەکانی چەکی دوژمن" و ئاماژەی بەوەشدا کە "هێزی ئاسمانی هاوپەیمانان رۆڵێکی بەرچاوی بینیووە لە بردنەوەی شەڕەکاندا لەلایەن هێزەکانمانەوە".

سەرۆکی ئەنجومەنی ناوخۆی ناحیەی بەغدادی، مالەڵڵا عوبەیدی، بە دیارونای وت خێڵەکانی رۆژئاوای ئەنبار دەیانەوێت رۆڵەکانیان بنێرن بۆ پەیوەندیکردن بە هێزە ئەمنیەکانەوە بۆ رزگارکردنی ناوچەکە لەدەست داعش.

عوبەیدی وتی: "لەماوەی دوو ساڵی رابردوودا، خەڵکی ناوچەکانی رۆژئاوا بەدەست چەوسانەوە و ستەمێکی زۆری داعشەوە ناڵاندویانە و ئێستا بەتەواوی ئامادەن بەشداربن لە هەر ئۆپەراسیۆنێکی سەربازیدا بۆ تێکشکاندنی تێرۆریستەکان."

وتیشی: "زۆر لە خێڵەکان ئامادەن خۆبەخشانە پەیوەندی بکەن بە هێزە ئەمنیەکانەوە و داوا لە حکومەت دەکەین چەك و فیشەکیان بداتێ."

پاکتاوکردنی داعش

فەرماندەی یەکێك لە هێزە خێڵەکیەکانی رۆژئاوای ئەنبار، عەمید محەمەد مەحلاوی، وتی جەنگاوەرەکانی "سەر بە خێڵی جیاوازن کە بەدەست تاوانکاری و کردەوەکانی تێرۆریستانەوە ناڵاندویانە و ئەمڕۆ دەیانەوێت تۆڵە لە داعش بکەنەوە".

مەحلاوی بە دیارونای وت: "هێزە خێڵەکیەکانمان لەژێر فەرماندەیی هاوبەشی ئۆپەراسیۆنەکانی جەزیرەدا دەجوڵێن بۆ بەدەستهێنانی ئامانجەکانیان. هەزاران جەنگاوەرمان هەیە کە لەپاڵ سوپا و پۆلیسدا شەڕدەکەن بۆ پاکردنەوەی ناوچەکانیان لە چەتە تاوانکارەکانی داعش."

وتیشی هێزە هاوبەشەکان بەمزوانە داعش لە پاشماوەی قەڵاکانیان لە ئەنبار دەردەپەڕێنن و "ئیتر دەتوانین خەڵکە گەمارۆدراوەکەمان رزگاربکەین و ئاڵای عێراق لەسەر هەموو بینا گشتیەکان هەڵبکەین."

سەرۆکی ئەنجومەنی ناوخۆیی شارۆچکەی قائیم، نازم بەردان، بانگەشەی کرد بۆ رزگارکردنی دانیشتوانی شارۆچکەکەی کە ئێستا لەلایەن داعشەوە گەمارۆدراوە.

بەردان بە دیارونای وت: "بارودۆخی مرۆیی لە ناوچەکانی رۆژئاوای پارێزگای ئەنبار و لەنێویشیاندا قائیم، زۆر خراپە، چونکە ناوچە گەمارۆدراوەکانی ئەوێ کە زیاتر لە 20,000 خێزانیان تیا دەژین، رۆژانە روبەڕوی هەموو جۆرێك لە توندوتیژی دەبنەوە لەلایەن تێرۆریستانەوە."

ناوبراو داوای لە هێزە ئەمنیەکان کرد هەوڵەکانی رزگارکردنیان خێراتربکەن چونکە "داعش خەڵکەکەی دەسبەسەرکردووە و وەك بارمتە بەکاریاندەهێنێت و هەرکەس هەوڵی دەربازبوون بدات دەیانکوژن یان ئەشکەنجەیان دەدەن."