هه‌واڵه‌كانی عێراق
میدیا

سەندیکایەکی عێراقی پەیامنێران دەنێرێت بۆ بەرەکانی شەڕ

خالید ئەلتائی

پەیامنێرێکی جەنگی عێراقی، عەلاء عەیدانی، کە لەکاتی روماڵکردنی شەڕدا دژ بە "دەوڵەتی ئیسلامی لە عێراق و شام" (داعش) بریندارکرا، چاوپێکەوتنێك لەسەر شەقامێکی بەغدا ئەمجامدەدات. [خاوەنی وێنە: وەزارەتی بەرگری عێراق]

پەیامنێرێکی جەنگی عێراقی، عەلاء عەیدانی، کە لەکاتی روماڵکردنی شەڕدا دژ بە "دەوڵەتی ئیسلامی لە عێراق و شام" (داعش) بریندارکرا، چاوپێکەوتنێك لەسەر شەقامێکی بەغدا ئەمجامدەدات. [خاوەنی وێنە: وەزارەتی بەرگری عێراق]

لقی دیالەی سەندیکای رۆژنامەوانان بەمدواییانە هەنگاوێکی نا بۆ پشتگیریکردن لە هێزە عێراقیەکان لە شەڕیاندا دژ بە "دەوڵەتی ئیسلامی لە عێراق و شام" (داعش) بە ناردنی هەندێك رۆژنامەوانان بۆ بەرەکانی شەڕ لە فەلوجە.

بە وتەی سەرۆکی لقی دیالەی سەندیکاکە، ساجد ئەلمەهداوی، کاروانی قەڵەمە نیشتمانیەکان کە لە 28 ئایار دامەزرا، بەنیازە گەشتێكی مەیدانی بۆ رۆژنامەوانان و میدیاکاران و نوسەرانی دیالە سازبدات بۆ بەرەکانی شەڕ.

مەهداوی وتی بەشداربووان "چاوپێکەوتن لەگەڵ جەنگاوەراندادەکەن و دەربارەی رەوشی شەڕەکان دەنوسن و سەرنج و چیرۆکەکانیشیان بە دەنگ و ڤیدیۆ تۆماردەکەن".

وتی: "ئێمە وەك رۆژنامەنوس و نوسەر و رۆشنبیرانی پارێزگاکە دەمانەوێت لەڕێگای ئەم هەنگاوەوە پەیامێکی پشتگیری بۆ هێزەکانمان لە سوپا و پۆلیس و حەشدی شەعبی و جەنگاوەرە عەشایەرەکان بنێرین."

وتیشی: "ویستمان پێیان بڵێین ' ئێمە لەگەڵتانداین لەهەمان سەنگەردا و بەجێتان ناهێڵین'."

هەروەها وتی: "ئەم شەڕە هەر شەڕی چەك نیە، بەڵکو هی چەك و قەڵەمیشە پێکەوە. ئەوە بەرپرسیارێتیی نیشتمانی و ئەخلاقی و پیشەییمانە لەپشت هێزەکانمان بین و روناکی بخەینەسەر قوربانیدان و سەرکەوتنەکانیان و بەشداریبکەین لە بەرزکردنەوەی ورەیان بۆ شەڕکردن دژی تێرۆریستەکان."

بەرپەرچدانەوەی پڕوپاگەندەی داعش

مەهداوی وتی ئەم هەنگاوە بۆ بەرپەرچدانەوەی "بەئەنقەست شێواندنی راستی" یە لەلایەن هەندێك وێبسات و کەناڵی ئاسمانی و رۆژنامەوانانەوە کە هەوڵدەدەن تۆوی دووبەرەکی تایەفەگەرایانە بچێنن لەڕێگای دروستکردنی هەواڵەوە بۆ کارکردنەسەر رەوتی شەڕەکە.

ئاماژەی بەوەش دا کە لەئێستادا پەیامنێرانی جەنگ لە دیالەوە چوون بۆ روماڵکردنی شەڕ لە پارێزگاکانی ئەنبار و سەڵاحەدین "بەتەواوی راستگۆییەوە".

وتی ئەم هەڵمەتە نوێیە بەمەستی دابینکردنی روماڵێکی میدیایی گەورەترە بۆ بەرپەرچدانەوەی شێواندنی راستیەکان.

ئەندامێکی ئەنجومەنی سەندیکای رۆژنامەوانانی عێراقی، حەسەن ئەلعەبودی، وتی ئەم هەنگاوە سەرچاوەکانی زانیاری بۆ جەماوەری ناوەوە و دەرەوەی عێراق بەرفراوانتر دەکات و روناکییش دەخاتەسەر ئەوەی بەڕاستی لەسەر ئەرز روودەدات.

عەبودی بە مەوتینی وت: " ئەمڕۆ ئێمە روبەڕووی هێرشێکی میدیایی بووینەتەوە لەلایەن تێرۆریستان و هەوادارانیانەوە، هەروەها بڵاوکردنەوەی هەواڵ و زانیاری ساختە بەمەبەستی پڕوپاگەندە و فشاری دەرونی."

وتی کاروانی قەڵەمە نیشتمانیەکان بەرپەرچی هەوڵەکانی داعش دەداتەوە بۆ لاوازکردنی ورەی جەنگاوەرە عێراقیەکان و خوڵقاندنی وەهمی شەڕێکی تایەفەگەری.

هەروەها وتی: "داوا لە هەموو ئەوانە دەکەین کە لە بوارەکانی میدیا و رۆژنامەوانی و کولتوردا کاردەکەن پشتگیری لە هێزەکانمان و حەشدی شەعبی بکەن لەڕێگای بڵاوکردنەوەی هەواڵی سەرکەوتنەکانیان و چیرۆکی مرۆڤدۆستانە دەربارەی رزگارکردنی مەدەنیەکان لە ناوچەکانی شەڕدا، لەپاڵ روماڵکردن و تۆمارکردنی هەموو تاوانەکانی تێرۆریستاندا."

پاراستنی پەیامنێرانی جەنگ

عەبودی وتی سەندیکا بەپەرۆشەوەیە بۆ پاراستنی ژیانی پەیامنێران.

وتی: "ئەوان زیاتر دەبنە ئامانجی داعش کە وەك دوژمنێکی سەرسەخت سەیریان دەکات، چونکە راستیەکانیان ئاشکرا دەکەن و بانگەشەکانیان بەدرۆدەخەنەوە."

وتیشی: "بەرنامەیەکی هاوبەش لەگەڵ فیدراسیۆنی رۆژنامەوانانی نێودەوڵەتی هەیە بۆ راهێنانی پەیامنێرانی جەنگی عێراقی لەسەر ئەوەی چۆن خۆیان بپارێزن لە بەرەکانی شەڕدا و روبەڕووی بارودۆخە پڕمەترسیەکان ببنەوە. تائێستا دەیان خولی راهێنانی مەیدانیمان سازداوە لەلایەن شارەزایانی بەئەزمونەوە."

سەرۆکی روانگەی ئازادی رۆژنامەوانی عێراقی، زیاد ئەلعجەیلی، بە مەوتینی وت عێراق لەئێستادا لە روبەڕوبوونەوەیەکی چارەنوسسازدایە لەگەڵ داعش، گروپێك کە "چەندان وەحشیگری ئەنجامداوە و هێشتا زیاتریش ئەنجامدەدات".

وتی لەگەڵ چڕبوونەوەی شەڕەکەدا "پێویستمان بە هەڵمەتێکی میدیایی هەیە بۆ خستنەڕووی راستیەکان دەربارەی ئەم تێرۆریستانە و کردەوە دڕندانەکانیان، لەپاڵ روماڵکردنی پیشەییانەی شەڕەکاندا بۆ گواستنەوەی راستیەکان و پوچەڵکردنەوەی پڕوپاگەندەکانیان."

عجەیلی وتی هەر روماڵکردنێكی "بێلایەن و راستگۆیانە سەرکەوتنێکە بۆ میدیای عێراقی".

وتیشی: "ئەو پەیامنێرانەی لەگەڵ هێزە ئەمنیەکانن، بەرەوڕووی مەترسی دەبنەوە بۆ گەیاندنی راستی بە خەڵك." هەروەها جەختی لەسەر ئەوە کرد کە پێویستە بپارێزرێن لەکاتی کارکردندا.

عجەیلی وتی لەوکاتەوەی ئۆپەراسیۆنی رزگارکردنی فەلوجە دەستیپێکردووە سێ پەیامنێری عێراقی لەکاتی روماڵکردنی شەڕدا برینداربوون.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500