لەگەڵ دەستپێکردنی مانگی موبارەکی رەمەزان، وەزارەتی بەرگری عێراق رێوشوێنە ئەمنیەکانی چڕترکردۆتەوە بۆ پتەوترکردنی ئاسایشی گشتی و پاراستنی هاوڵاتیان لە هێرشەکانی "دەوڵەتی ئیسلامی لە عێراق و شام" (داعش).

ئەم وەزارەتە لە 31 ئایاردا زنجیرەیەکی نۆێی لە رێوشوێنی ئەمنی راگەیاند، پاشئەوەی بەمدواییانە ژمارەی تەقینەوە خۆکوژیەکان لە بازاڕە گشتیەکان و چایخانەکانی بەغدادا زیادیکردبوو.

ئەمەش ترسی ئەنجامدانی هێرشی تری لە رەمەزاندا زیادکرد، کە تێیدا چالاکی بازاڕکردن و گردبوونەوەی خەڵك زۆر زیاتر دەبێت.

رێوشوێنی ئەمنی نوێ

وتەبێژی ئەم وەزارەتە، نەسیر ئەلنوری، بە مەوتینی وت: "بەڕەچاوگرتنی ئەم هێرشانە، کۆمەڵێك رێوشوێنی ئەمنی نوێمان گرتەبەر بۆ روبەڕوبوونەوەی تێرۆریستان و رێگالێگرتنیان لە قۆستنەوەی مانگی موبارەکی رەمەزان بۆ هەڕەشەکردن لە ئاسایش و سەلامەتی هاوڵاتیان."

وتی بەشێك لەم رێوشوێنانە بریتین لە باشترکردنی کاری هەواڵگری بە خستنەکاری ئەندامانی ئاسایش بە جلی مەدەنیەوە لە گەڕەکەکاندا و هاندانی "راگرتنی ئاسایش لەلایەن کۆمەڵگە خۆیەوە".

نەسیر نوری وتیشی وەزارەت ئەرکی پاراستنی ئاسایش بەسەر هێزە ئەمنیەکاندا بەپێی ناوچە جوگرافیەکان دابەشدەکات کە پەیوەست دەبن بە فەرماندەیی ناوەندی ئۆپەراسیۆنە سەربازیەکانەوە بۆ هەماهەنگی و رێکخستنی ئەرك و هەوڵە ئەمنیەکان.

وتیشی: "هەروەها بە نیازین ئامێر و تەکنۆلۆژیای پێشکەوتوو بۆ دۆزینەوەی تەقەمەنی و کامێرای چاودێری بخەینەکار."

وتیشی چەکدارانی داعش شارۆچکەی کەرمە و ناوچەکانی دەوروبەری فەلوجەیان لە ئەنبار بەکاردەهێنا بۆ ئەنجامدانی هێرشی تێرۆریستی بۆسەر بەغدا و پارێزگاکانی ناوەڕاست و خواروو.

هەروەها وتی: "پاشئەوەی هێزەکانمان بەمدواییانە لە ئۆپەراسیۆنی 'تێکشکاندنی تێرۆرزم' دا بۆ ئازادکردنی فەلوجە، ئەو ناوچانانەیان گرتەوە و بنکەکانی داعشیان لەوێ وێرانکرد، بەدڵنیاییەوە ئەم سەرکەوتنانە یارمەتی کەمکردنەوەی هەڕەشەی تێرۆریزم دەدەن، ئاستی ئاسایشی گشتی باشتردەکەن و دوژمن لە ناوەندی شارەکان دووردەخەنەوە."

داعش پەنا دەباتەبەر تەقینەوەی خۆکوژی دوای دۆڕاندنەکانی

نەسیر نوری وتی داعش چەند دۆڕاندنێکی گەورەی بەسەرهات لە پارێزگاکانی ئەنبار و سەڵاحەدین و توانای رێگریکردنی لە پێشڕەویی هێزە ئەمنیەکان لەدەستدا.

وتی ئەم گروپە هەوڵدەدات هێرشەکانی زیاتربکات لەڕێگەی بەکارهێنانی ئەو خۆکوژانەوە کە بە "شەڕکەرانی ئینغیماسی" ناسراون.

وتیشی داعش ئەو نیشانە ئاسانانە هەڵدەبژێریت کە خەڵکێکی زۆریان لێیە بۆئەوەی زۆرترین ژمارە قوربانی بخاتەوە و هێزە ئەمنیەکان لە ئۆپەراسیۆنە سەربازیەکان خافڵ بکات.

هەروەها وتی: "ئەم گروپە هەوڵیش دەدات ئەو پەیامە بنێرێت کە هێشتا بەهێزە و دەتوانێت شەڕەکە بهێنێتە ناو شارە ئارامەکانەوە. بوار بەو تاوانبارانە نادەین هەڕەشە لە ژیانی خەڵکی بێتاوان بکەن و بەرەنگاریان دەبینەوە."

ئەندامێکی لیژنەی ئەمنی لە ئەنجومەنی پارێزگای بەغدا، سەعد ئەلمەتڵەبی، وتی: "ئەو گورزانەی بەمدواییانە بەر داعش کەوتوون و لەدەستدانی زۆر لە قەڵاکانی، ناچاریان کردووە دواهەمین کارتی راکێشێت کە هێرشی خۆکوژیە بۆ بەدەستهێنانی دەستکەوتی پڕوپاگەندانە و کەمکردنەوەی نائومێدی لەلای چەکدارانی."

مەتڵەبی بە مەوتینی وت: "ئەمڕۆ تەرکیز لەسەر دەرپەڕاندنی داعشە لە فەلوجە و ناوچەکانی دەوروبەری و لێدانی حەشارگا و قەڵاکانی لە ناوچەکانی پشتێنەی بەغدا."

زیادکردنی هەوڵەکانی هەواڵگری

مەتڵەبی جەختی لەسەر پێویستیی خستنەگەڕی کاری هەواڵگری کرد وەك یەکێك لە گرنگترین رێوشوێنە ئەمنیەکان و کاریگەرترینیان لە پاراستنی خەڵکدا، جا لە رەمەزاندا بێت یان هەر کاتێکی تر.

وتیشی: "دەبێت ئێمە هەواڵگرانی مەشقپێکراو و کارامە بەکاربهێنین کە بتوانن دزەبکەنە ناو ریزەکانی تێرۆریستانەوە و شانە و پلانەکانیان ئاشکرابکەن و رێگا بە هێرشەکانیان بگرن پێش رودانیان."

شارەزای بواری گروپە تێرۆریستیەکان، هیشام ئەلهاشمی، وتی: "زیادبوونی هێرشە تێرۆریستیەکانی ئەم دواییە تەنها دژە تاکتیکێکە لەلایەن تێرۆریستانەوە بەکاردێت هەرکاتێك گوریسەکە لەملیاندا توود دەبێتەوە و هێزەکانیان تێکدەشکێن."

هاشمی بە مەوتینی وت داعش هەوڵدەدات ئەم تاکتیکە بەکاربهێنێت بۆ لابردنی سەرنج لەسەر شکستەکانی لە بەرەکانی شەڕدا.

وتیشی لەگەڵ دەسپێکردنی مانگی رەمەزان، دەبێت هێزە ئەمنیەکان هەموو رێوشوێنێکی پێشوەخت بگرنەبەر بۆ پاراستنی ئاسایشی هاوڵاتیان.

هەروەها وتی: " گرنگە هانی هاوڵاتیانیش بدرێت بۆ بینینی رۆڵێکی گەورەتر لە بەرەنگاریکردنی مێتۆدەکانی دوژمندا. ئەمەش پێویستی بە سازدانی کەمپینێکی گەورە هەیە بۆ زیادکردنی هۆشیاریی ئەمنی لەناو ئەندامانی کۆمەڵگەدا."