هه‌واڵه‌كانی عێراق
ئاساییش

عێراق پلانێکی ئەمنی نوێ جێبەجێدەکات لە دیالە

خالید ئەلتائی

یەکەیەکی پۆلیسی دیالە هێرش دەکەنە سەر حەشارگەیەکی "دەوڵەتی ئیسلامی لە عێراق و شام" (داعش) لە کيڵگەیەکدا لە میقدادیە. [خاوەنی وێنە: فەرماندەیی پۆلیسی دیالە]

یەکەیەکی پۆلیسی دیالە هێرش دەکەنە سەر حەشارگەیەکی "دەوڵەتی ئیسلامی لە عێراق و شام" (داعش) لە کيڵگەیەکدا لە میقدادیە. [خاوەنی وێنە: فەرماندەیی پۆلیسی دیالە]

شاری بەعقوبە بڵاوبوونەوەیەکی لەناکاوی هێزی پۆلیس بەخۆیەوە دەبینێت، وەك بەشێك لە پلانێکی ئەمنی نوێ بۆ پاراستنی دانیشتوان لە هێرشەکانی "دەوڵەتی ئیسلامی لە عێراق و شام" (داعش).

بە وتەی بەرپرسان، هێزەکانی پۆلیس لە دەروازەکان و جێگا گرنگەکانی بەعقوبەی ناوەندی پارێزگای دیالە بڵاوەدەکەن و خاڵی پشکنین لەسەر رێگاکانی دەرەوەی شارەکە دادەنێن.

قایمقامی بەعقوبە، عەبدوڵڵا ئەلحەیالی، بە مەوتینی وت ئەم پلانە "گەورەترینی پلانی لەم جۆرەیە لە شارەکەدا لەم چەند ساڵەی دواییدا".

حەیالی وتی: "هێزەکانی پۆلیس ئەم پلانەیان جێبەجێکرد دوای هێرشەکانی ئەم دواییەی داعش بۆ سەر شارەکە."

داعش بەرپرسیارێتی خۆی لە تەقینەوەیەکی خۆکوژی بە ئۆتۆمبیل لە 9 ئایار لە گوندی شفتە لە بەعقوبە راگەیاند کە لانیکەم 10 کەسی کوشت و 35 کەسیشی بریندار کرد، کە زۆربەیان ژن و منداڵ بوون.

پتەوکردنی ئاسایشی بەعقوبە

حەیالی وتی وەزارەتی ناوخۆ دوو یەکەی پۆلیسی لە پارێزگای واسیتەوە ناردووە بۆ پتەوکردنی ئاسایشی بەعقوبە، کە چەکی مۆدێرن و ئۆتۆمبیلی زریپۆشیان پێیە و راهێنانیان لەسەر ئەنجامدانی ئۆپەراسیۆنی تایبەتی وەرگرتووە.

وتیشی: "بەشيك لە پلانەکە پێکهێنانی پشتێنەیەکی ئەمنی تەنگە بەدەوری شارەکەدا لەگەڵ دانانی خاڵی پشکنینی جێگیر لە دەروازەکاندا و لەسەر ئەو رێگا دەرەکیانەی دەچنەوە سەر ناوەڕاستی شار و گەڕەکەکانی دەوروبەری."

هەروەها وتی دەوریەی ئاسایش دەردەچێت بۆ چاودێری و دەستگیرکردنی ئەندامانی داعش و ئەوانەی گومانی دزەکردنیان لێدەکرێت بۆ ناو شارەکە و هێرشکردنە سەر حەشارگاکانیشیان.

وتی: "هەروەها رێوشوێنی توند دەگیرێتەبەر لەگەڵ هەر کەسێك دا کە بێ مۆڵەت چەك هەڵبگرێت."

حەیالی وتیشی: "پلانەکە بەباشی بەڕێوەدەچێت، بەڵام هێشتا زووە بۆ راگەیاندنی هەر ئەنجامێك. هێزە ئەمنیەکان بەوپەڕی لێهاتوویی و پیشەیی یاسا و ئارامی دەسەپێنن و باری ئاسایش لە بەعقوبەدا سەقامگیرە و ژیانی ئاسایی بەرقەرارە."

وتی خەڵكی بەعقوبە پشتگیری تەواوی خۆیان بۆ ئەم رێوشوێنە ئەمنیە نوێیانە پیشانداوە و زانیارییان دەربارەی کەسان و چالاکی گومانلێکراو لەشارەکەدا داوە بە هێزە ئەمنییەکان.

دانیشتوان پشتگیری لە پلانە نوێکە دەکەن

دانیشتویەکی گەڕەکی موعەلیمین لە بەعقوبە بە ناوی محەمەد ئەلمەعموری وتی: " ئێمە روبەڕووی دوژمنێکی فێڵباز و خوێنڕێژ بووینەتەوە کە خەڵکی بێتاوان دەکاتە ئامانج، بەڵام لەسەر دەستی هێزە جەربەزەکانمان و پشتگیری ئێمە تێکدەشکێت."

مەعموری بە مەوتینی وت دانیشتوان پشتگیری لە پلانە ئەمنیە نوێکە دەکەن و بەیەکگرتوویی بەگژ تێرۆریزمدا دەچنەوە.

وتیشی: "تێرۆریستەکان لە هەموو کاتێك زیاتر نزیكبوونەتەوە لە دۆڕاندان و لەناوچوون."

سەرۆکی لیژنەی ئاسایشی سەر بە ئەنجومەنی پارێزگای دیالە، سادق ئەلحوسەینی، وتی زیادبوونی هێرشەکان لەم پارێزگایەدا "ئاماژەیەکی ئاشکرایە بۆ پوکانەوەی تواناکانی تێرۆریستان".

حوسەینی بە مەوتینی وت: "دوای زنجیرەیەک تێکشکانی داعش لەسەر دەستی هێزە ئەمنیەکانمان و حەشدی شەعبی، گەڕاونەتەوە بۆ ئەنجامدانی هێرشی ترسنۆکانە بە ئۆتۆمبیل و پشتێنی بۆمبڕێژکراو لە گەڕەك و بازاڕ و جێگا گشتیەکاندا."

وتی: "ئەم هێرشانە بەتایبەتی ئەو شارانەی پارێزگاکەیان کردۆتە ئامانج کە ناسراون بە جۆراوجۆری دانیشتوانەکەی و بەوەی کە پڕن لە ژیان، وەك بەعقوبە، خاڵس، میقدادیە و بەلەد روز. ئەمەش لە هەوڵێکی نائومێدانەدا بۆ لێکترازانی پێکهاتەی کۆمەڵایەتی لەم ناوچانەدا و هاندانی خەڵک دژ بە هێزە ئەمنیەکان تا ئاژاوە بنێنەوە."

بەئامانجگرتنی بنکە و شانەکانی داعش

حوسەینی وتی ئەم پلانە نوێیە شانە تێرۆریستیەکان دەکاتە ئامانج بۆ هەڵوەشانەوەی هێرشەکانیان و ئاماژەی بەوەش دا کە " هێزە ئەمنیەکان هەوڵێکی بێوێنە دەدەن لە پارێزگاکەدا".

هەروەها وتی: "ئەمساڵ تا ئێستا توانیویانە حەوت کەمپی داعش لە باکوری میقدادیە و باشوری بەلەد روز وێرانبکەن کە داعش کردبوونیە بنکەیەك بۆ جێبەجێکردنی کردە تێرۆریستیەکان."

شارەزای بواری ستراتیجی و ئەفسەری سوپای پێشوو، ئەحمەد ئەلشەریفی، وتی داعش تەرکیزی کردۆتە سەر دیالە لەبەر گرنگیە جوگرافیەکەی و کۆمەڵگا فرەنەژادییەکەی.

هەر بۆیەش، وەک شەریفی وتی، پێوویست بە رێوشوێنی ئەمنی زیاتر هەیە لەم پارێزگایەدا "تاکو چەکدارەکان هیج بوارێکیان بۆ نەمێنێتەوە تا هەڕەشە لە ئاسایشی دانیشتوانەکەی بکەن و سوود لە بۆشاییە [ئەمنیەکان] وەربگرن بۆ ئەنجامدانی چالاکیە تێرۆریستیەکانیان".

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500